ნადინ აეუბი გახდება პირველი ქალი, რომელიც მის სამყაროს კონკურსზე პალესტინას წარადგენს.

მის სამყაროს ორგანიზაციამ (MUO) კვირას CNN-სთან გავრცელებულ განცხადებაში თქვა, რომ "სიამოვნებით ადასტურებს", რომ აეუბი მონაწილეობას მიიღებს მის სამყარო 2025-ის კონკურსში, რომელიც ნოემბერში გაიმართება.

ნადინ აეუბი, მის პალესტინა 2022

ნადინ აეუბი, მის პალესტინა 2022

ფოტო: CNN

"მის სამყაროს ორგანიზაცია ამაყად მასპინძლობს დელეგატებს მთელი მსოფლიოდან, ზეიმობს მრავალფეროვნებას, კულტურულ გაცვლასა და ქალთა გაძლიერებას", — ნათქვამია განცხადებაში.

"ქალბატონი აეუბი, წარმატებული აქტივისტი და მოდელი პალესტინიდან, განასახიერებს გამძლეობასა და მიზანდასახულობას, რაზეც დგას ჩვენი პლატფორმა", — დამატებულია იქვე.

აეუბი 130-ზე მეტი ქვეყნისა და ტერიტორიის წარმომადგენლებს მის სამყაროს 74-ე ფინალში შეუერთდება, რომელიც 21 ნოემბერს ბანგკოკში, ტაილანდში გაიმართება.

"ველოდებით ქალბატონი აეუბის მის სამყაროს სცენაზე, სადაც ის მთელი მსოფლიოს კონკურსანტებთან ერთად, ამაყად წარადგენს პალესტინას" — განაცხადა MUO-მ.

აბუ-დაბიში დაფუძნებული გამოცემის, The National-ის მიხედვით, 27 წლის აეუბი მის პალესტინა 2022 წელს გახდა. ხუთშაბათს ინსტაგრამზე გამოქვეყნებულ პოსტში, აეუბიმ თქვა, რომ სურს გახდეს პალესტინელი ხალხის ხმა.

"ჩემთვის პატივია გამოვაცხადო, რომ პირველად ისტორიაში, პალესტინა იქნება წარმოდგენილი მის სამყაროზე", — დაწერა მან.

"როცა პალესტინას ტკივა — განსაკუთრებით ღაზაში — მე იმ ხალხის ხმა ვარ, ვინც უარს ამბობს დადუმებაზე. მე წარმოვადგენ თითოეულ პალესტინელ ქალსა და ბავშვს, რომლის ძალაც მსოფლიომ უნდა დაინახოს", — დაამატა აეუბიმ, — "ჩვენ ვართ ბევრად მეტი, ვიდრე ჩვენი ტანჯვა — ჩვენ ვართ გამძლეობა, იმედი და სამშობლოს გულისცემა, რომელიც ჩვენში აგრძელებს ცხოვრებას".

სილამაზის კონკურსში პალესტინელი მონაწილის ჩართვის გადაწყვეტილება ისრაელის ომის მზარდი საერთაშორისო კრიტიკის ფონზე მიიღეს. პალესტინის ჯანდაცვის სამინისტროს მიერ ორშაბათს გამოქვეყნებული განცხადების თანახმად, 2023 წლის ოქტომბრიდან კონფლიქტის დაწყების შემდეგ ღაზას სექტორში სულ მცირე 62,004 ადამიანი დაიღუპა.

ღაზის ხელისუფლება მსხვერპლში არ არჩევს მშვიდობიან მოსახლეობასა და ჰამასის მებრძოლებს, თუმცა როგორც ჯანდაცვის სამინისტრო, ისე გაერო აცხადებენ, რომ მსხვერპლთა უმეტესობა ქალები და ბავშვები არიან.

ომის პარალელურად, სულ უფრო მეტი ქვეყანა აცხადებს მზაობას პალესტინის სახელმწიფოს აღიარების შესახებ. ამის თაობაზე საერთაშორისო მოწოდებას უკვე 145-ზე მეტი ქვეყანა შეუერთდა.