თურქეთში, ბალიქესირის ჩრდილო-დასავლეთ პროვინციაში, კვირას საღამოს მომხდარ 6.1 მაგნიტუდის მიწისძვრას ერთი ადამიანი ემსხვერპლა — ამის შესახებ BBC გვატყობინებს.

თურქეთის შინაგან საქმეთა მინისტრის განცხადებით, სინდირგის ქალაქში, რომელიც მიწისძვრის ეპიცენტრი იყო, ნანგრევებიდან გამოყვანილი 81 წლის ქალი მალევე გარდაიცვალა.

ალი ერლიქაიას თქმით, ბიძგების შედეგად 16 შენობა ჩამოინგრა და 29 ადამიანი დაშავდა.

თურქეთის კატასტროფების მართვის სააგენტოს ცნობით, მიწისძვრა ადგილობრივი დროით 19:53 საათზე დაფიქსირდა და მისი ბიძგები სტამბოლშიც იგრძნობოდა. პრეზიდენტმა რეჯეფ თაიფ ერდოღანმა დაზარალებულებს სწრაფი გამოჯანმრთელება უსურვა და აღნიშნა, რომ ყველა სამაშველო სამუშაოს პირადად აკვირდება.

შინაგან საქმეთა მინისტრის განცხადებით, სამძებრო-სამაშველო სამუშაოები დასრულებულია და სხვა სერიოზული დაზიანებების ან მსხვერპლის შესახებ ინფორმაცია არ არსებობს. თუმცა სინდირგიდან გავრცელებულ ფოტოებში ჩანს, რომ ზოგი შენობა მთლიანად არის ჩამონგრეული.