დანიის ქალაქ ოლბორგში მდებარე ზოოპარკი მტაცებელი ცხოველების გამოსაკვებად ახალ გზებს ეძებს. ზოოპარკი მოსახლეობას "არასასურველი", მაგრამ ჯანმრთელი შინაური ცხოველების ჩაბარებას სთხოვს, რომლებსაც, მოგვიანებით, ევთანაზიას გაუკეთებენ და საკვებად მიაწვდიან თავიანთ ბინადრებს. დაწესებულება იბარებს ცოცხალ ქათმებს, კურდღლებს და ზღვის გოჭებს. ხოლო იმ შემთხვევაში, თუკი ცხენს ჩააბარებენ, მეპატრონე საგადასახადო შეღავათსაც მიიღებს. ზოოპარკის მტკიცებით, მტაცებლებისთვის, განსაკუთრებით ფოცხვერისთვის, დაუნაწევრებელი ნადავლის მიწოდებაა საჭირო — ისეთისა, როგორსაც ბუნებრივ პირობებში მოინადირებდა.

"ზოოპარკებში ვალდებულება გვაქვს, ცხოველების კვება, მათივე კეთილდღეობისთვის, ბუნებრივ ჯაჭვს მივამსგავსოთ", — ნათქვამია ზოოპარკის განცხადებაში.

თუმცა, განცხადებას სოციალურ ქსელში იმდენად უარყოფითი გამოხმაურება მოჰყვა, რომ ზოოპარკს თავის გვერდზე კომენტარების სექციის შეზღუდვა მოუწია.

"რა ამაზრზენია", — წერს ერთ-ერთი ინტერნეტმომხმარებელი, — "როგორ უნდა გაიმეტო შენი ჯანმრთელი შინაური ცხოველი მოსაკლავად. აი, ასე აქეზებენ ხალხს, რომ კარგად არ დაფიქრდნენ ცხოველის ყოლამდე, რადგან, ოლბორგის ზოოპარკის დამსახურებით, ნებისმიერ დროს შეძლებენ მათ თავიდან მოცილებას".

აღსანიშნავია, რომ ჩასაბარებელი ცხოველის ჯანმრთელობა მთავარი მოთხოვნაა — მაგალითად, ცხენის შემთხვევაში, მას უნდა გააჩნდეს პასპორტი და ბოლო 30 დღის განმავლობაში არ უნდა ჰქონდეს გადატანილი დაავადება.

ზოოპარკის დირექტორის მოადგილე, პია ნილსენი, ამბობს, რომ ისინი უკვე წლებია, რაც პატარა ცხოველებს მტაცებლების გამოსაკვებად იყენებენ.

"როცა ხორცისმჭამელი ცხოველები გყავს, აუცილებელია, მათ ხორცი მიაწოდო, უმჯობესია, მისივე ბეწვით და ძვლებით, რათა ბუნებრივ საკვებთან მიახლოებული იყოს", — ხსნის ნილსენი, — "ამდენად, ლოგიკურია, რომ ამ დანიშნულებით ვიბარებთ ცხოველებს, რომლებსაც სხვადასხვა მიზეზით ევთანაზიის გაკეთება სჭირდებათ. დანიაში ეს გავრცელებული პრაქტიკაა და ჩვენს ბევრ სტუმარსაც მოსწონს შეთავაზება".

ასევე იხილეთ: