ცნობილი ნორვეგიელი პოპმომღერალი და მევიოლინე ალექსანდრ რიბაკი, რომელმაც თავის ქვეყანას 2009 წლის ევროვიზიაზე გამარჯვება მოუტანა, შემოდგომაზე საქართველოს ეწვევა. 22 ოქტომბერს რიბაკი თბილისში კონცერტს გამართავს. ორგანიზატორების ცნობით, ღონისძიება VIP შეთავაზებას მოიცავს — მუსიკოსთან პირადად შეხვედრის, ფოტოს გადაღებისა და ავტოგრაფის ჩამორთმევის შესაძლებლობებს.

კონცერტი 22 ოქტომბერს, საღამოს 8 საათზე დაიწყება და მისი მასპინძელი თბილისი მარიოტი იქნება. შოუზე დასასწრები ბილეთების გაყიდვა უკვე დაწყებულია. სტანდარტული ბილეთის ღირებულება 59 ევროა (~188 ლარი), მშობლისა და ბავშვის ერთობლივი ბილეთის ფასი კი 88 ევროს (~280 ლარი) შეადგენს.

საქართველოში ჩამოსვლამდე, რიბაკი კონცერტს გამართავს ერევანშიც. ღონისძიებების ორგანიზატორი სწორედ სომხეთში დაფუძნებული კომპანია Candle Concerts არის.

ალექსანდრ რიბაკი წარმოშობით ბელარუსი მუსიკოსია. იგი ბავშვობაში ოჯახთან ერთად გადავიდა ნორვეგიაში საცხოვრებლად. 2009 წელს, რიგით 54-ე ევროვიზიის სიმღერის კონკურსზე, რომელსაც მოსკოვი მასპინძლობდა, 23 წლის რიბაკმა ნორვეგია თავისი საავტორო სიმღერით Fairytale წარადგინა და გაიმარჯვა. მომღერალმა ჟიურისა და ტელემაყურებლისგან ჯამში 387 ქულა მიიღო, რაც ევროვიზიაზე ხმების დათვლის ახალი ფორმატის შემოღებამდე რეკორდულ შედეგს წარმოადგენდა.

ევროვიზიის მოგების შემდეგ, რიბაკმა სადებიუტო ალბომი Fairytales გამოუშვა, რომელიც ევროპის რამდენიმე ქვეყნის ჩარტებში მოწინავე პოზიციებზე აღმოჩნდა. მუსიკოსი 2018 წელსაც დაბრუნდა ევროფესტივალზე, მაგრამ იმჯერად კონკურსზე მე-15 ადგილს დასჯერდა. რიბაკი საუბრობს და მღერის ინგლისურ, ნორვეგიულ და რუსულ ენებზე.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...