კომუნიკაციების კომისიის (ComCom) განცხადებით, "მაგთიკომის" მიერ ფიქსირებულ ინტერნეტ მომსახურებაზე ტარიფის ზრდა დაუსაბუთებელია და მომხმარებლის ინტერესებს ზღუდავს. კერძოდ, 2025 წლის 1 აგვისტოდან, 496 000-მდე აბონენტისთვის ინტერნეტის ფასი 3 ლარით მოიმატებს.

ComCom-ის ინფორმაციით, გადაწყვეტილება განსაკუთრებით საყურადღებოა მაღალი ინტერნეტის ფასების ფონზე, რომლებიც ევროპულ საშუალო მაჩვენებლებთან შედარებით უკვე გადაჭარბებულია. რეგულატორი საკითხს მოქმედი კანონმდებლობის ფარგლებში შეისწავლის და დააკვირდება, სხვა ოპერატორებიც თუ შეუერთდებიან ტარიფის ზრდას.

თუ ტარიფის ცვლილების მიუხედავად კომპანია აბონენტებს არ დაკარგავს, მისი წლიური შემოსავალი 13.9 მილიონი ლარით გაიზრდება.

"გაზრდილი ტარიფების პირობებში, თუ ამ გადაწყვეტილების შემდეგ "მაგთიკომი" არცერთ აბონენტს არ დაკარგავს, ComCom-ის დაანგარიშებით კომპანია ყოველთვიურად 1,159,874 ლარს მიიღებს, რითიც მისი წლიური შემოსავალი საშუალოდ 13,918,485 ლარით გაიზრდება", — ნათქვამია ComCom-ის განცხადებაში.

აღსანიშნავია, რომ კომისიამ "მაგთიკომს" ბაზარზე დომინანტი პოზიციის გამო ვალდებულებები დააკისრა, რომელთა მიხედვით, მნიშვნელოვანი ძალის მქონე ოპერატორს ექნება ვალდებულება, გარკვეული თანხის სანაცვლოდ მსურველ ოპერატორებს მისი ქსელისა თუ ინფრასტრუქტურის გამოყენების უფლება მისცეს. ამ ვალდებულებების აღსრულებაზე მუშაობა მიმდინარეობს.