21 წლის ნორვეგიელი ტურისტი, მადს მიკელსენი, აცხადებს, რომ იგი შეერთებული შტატებიდან მას შემდეგ დაადეპორტეს, რაც იმიგრაციის ოფიცრებმა მის ტელეფონში აღმოაჩინეს მიმი, რომელიც აშშ-ის ვიცე-პრეზიდენტს, ჯეი დი ვენსს დასცინოდა.

მიმზე ვენსი მელოტადაა გამოსახული და კარიკატურული მახასიათებლებით გამოირჩევა. როგორც Daily Mail იუწყება, ტურისტის ტელეფონში ის სავარაუდოდ ავტომატურად ჩაიტვირთა ჯგუფური ჩატის აპლიკაციიდან.

მიმი, რომელიც მიკელსენის მობილურში იპოვეს

მიმი, რომელიც მიკელსენის მობილურში იპოვეს

ფოტო: Daily Mail

მიკელსენი ნიუ-ჯერსიში, ნიუარკ ლიბერთის საერთაშორისო აეროპორტით იმ იმედით ჩამოფრინდა, რომ ნიუ-იორკში და ტეხასში მეგობრებს შეხვდებოდა. მას ასევე გეგმაში ჰქონდა დედასთან ერთად რამდენიმე ეროვნული პარკის მონახულება.

თუმცა, მისი მოგზაურობა არც კი დაწყებულა. მიკელსენის თქმით, იმიგრაციის ოფიცრებმა ის გვერდზე გაიყვანეს დასაკითხად და მალევე დაადანაშაულეს "ნარკოტრეფიკინგთან, ტერორისტულ შეთქმულებებსა და მემარჯვენე რადიკალიზმთან" კავშირების ქონაში.

"მათ ოთახში შემიყვანეს, სადაც რამდენიმე შეიარაღებული მცველი იმყოფებოდა. იქ მომთხოვეს გამეხადა ფეხსაცმელი, გადამეცა მობილური ტელეფონი და ზურგჩანთა," — განუცხადა მიკელსენმა ნორვეგიულ გამოცემა Nordlys-ს.

მან აღნიშნა, რომ ოფიცრები განსაკუთრებით შეწუხდნენ ჯეი დი ვენსის მიმით და კიდევ ერთი ფოტოთი, რომელშიც მიკელსენს ხელნაკეთი ხის ჩიბუხი ეჭირა — ორივე სურათი ჩატის აპლიკაციიდან ჰქონდა ავტომატურად შენახული. "ორივე ფოტო ავტომატურად ჩაიწერა ჩატიდან, და ნამდვილად ვერ წარმოვიდგენდი, რომ ასეთი უწყინარი ფოტოები ჩემი ქვეყანაში არშეშვების მიზეზი გახდებოდა," — აღნიშნა მან.

მიკელსენის თქმით, სიტუაცია სწრაფად გამწვავდა. მისივე მტკიცებით, აიძულეს ტელეფონის განბლოკვა ციხეში გაშვების ან $5,000-იანი ჯარიმის მუქარით. შემდეგ დეტალურად გაჩხრიკეს მისი ნივთები, აუღეს თითის ანაბეჭდები, სისხლის ნიმუში და მოსთხოვეს პირადი ინფორმაცია იმ ადამიანებზე, ვისთან შეხვედრასაც გეგმავდა.

"თორმეტი საათი ვიმგზავრე, ცუდად მეძინა და უკვე ფიზიკურადაც და მენტალურადაც სრულიად დაუძლურებული ვიყავი, როცა დაკითხვა დაიწყეს," — დაამატა მან. იმავე დღეს მიკელსენი ნორვეგიაში დააბრუნეს.

ამერიკაში გართულებული იმიგრაციის გამო მზარდი მღელვარების ფონზე, აშშ-ის საბაჟო და სასაზღვრო დაცვის სამსახურმა (CBP) განცხადება გაავრცელა და უარყო, რომ დეპორტაციასთან რაიმე კავშირი ჰქონდა. CBP-ს მტკიცებით, რეალური მიზეზი მიკელსენის მიერ წარსულში ნარკოტიკების გამოყენების აღიარება იყო.