აშშ-ის სახელმწიფო მდივანმა, მარკო რუბიომ ჩინეთს მოუწოდა, დაარწმუნოს ირანი, რომ არ გადაკეტოს ჰორმუზის სრუტე. ამის შესახებ ინფორმაციას Reuters ავრცელებს.

რუბიომ ეს განცხადება Fox News-ის გადაცემაში Sunday Morning Futures with Maria Bartiromo მას შემდეგ გააკეთა, რაც ირანულმა Press TV-მ გაავრცელა ინფორმაცია, რომ ირანის პარლამენტმა დაამტკიცა გადაწყვეტილება ჰორმუზის სრუტის ჩაკეტვის შესახებ — სრუტის, რომლის გავლითაც მსოფლიოში ნავთობისა და გაზის დაახლოებით 20% გადადის.

"მოვუწოდებ ჩინეთის ხელისუფლებას პეკინში, დაუკავშირდეს მათ [ირანს] ამ თემაზე, რადგან ისინი მნიშვნელოვნად არიან დამოკიდებული ჰორმუზის სრუტეზე ნავთობისთვის," — განაცხადა რუბიომ.

აშშ-ის სახელმწიფო მდივანმა ასევე აღნიშნა, რომ ირანის მხრიდან ამ ნაბიჯის გადადგმა მათთვის ეკონომიკური თვითმკვლელობა იქნება.

"თუ ისინი ამას გააკეთებენ, ეს იქნება კიდევ ერთი საშინელი შეცდომა. მათთვის ეს ეკონომიკური თვითმკვლელობა იქნება. ჩვენ გვაქვს პასუხის გაცემის შესაძლებლობები, მაგრამ ამაზე სხვა ქვეყნებმაც უნდა იფიქრონ, რადგან ეს გაცილებით უარყოფით გავლენას მოახდენს მათ ეკონომიკებზე, ვიდრე ჩვენზე," — თქვა მარკო რუბიომ.

მან ასევე აღნიშნა, რომ სრუტის ჩაკეტვა იქნება მასშტაბური ესკალაცია, რაც აშშ-ისა და სხვა ქვეყნების მხრიდან რეაგირებას გამოიწვევს.

აშშ-ში მდებარე ჩინეთის საელჩოს ამ თემაზე კომენტარი ამ დროისთვის არ გაუკეთებია.

ცნობისთვის, შეერთებულმა შტატებმა 22 ივნისს ირანში სამ ძირითად ბირთვულ ობიექტზე, ფორდოუზე, ისპაჰანსა და ნათანზიზე, იერიში მიიტანა, რომლის შედეგადაც The Times of Israel-ის ცნობით, 86 ადამიანი დაშავდა. ატომური ენერგიის საერთაშორისო სააგენტოს ცნობით, დაბომბვის შედეგად ირანის ბირთვულ ობიექტებზე რადიაციის დონე არ გაზრდილა.