ცნობილი ამერიკული სერიალის Modern Family-ის მსახიობი ობრი ანდერსონ-ემონსი ბისექსუალად დაქამინგაუთდა. ტიკტოკზე გამოქვეყნებულ ვიდეოში ანდერსონ-ემონსმა სერიალიდან ის სცენაც გააცოცხლა, სადაც მისი გმირი გაიძახის: "გეი ვარ, გეი!".

ამ კომიკურ სცენაში ობრის პერსონაჟს, ლილის, გლორია უხსნის, რომ იგი წარმოშობით ვიეტნამელია, რაზეც გოგო მტკიცე უარით ეპასუხება. საქმე ისაა, რომ მას წარმომავლობა სექსუალურ იდენტობაში ერევა: მისი კლასელის თქმით, იტალიელია, რადგან იტალიელი მშობლები ჰყავს, ლილი კი, რომელსაც გეი მშობლები ჰყავს, აცხადებს, რომ ასე თავადაც გეი გამოდის.

სცენა დღემდე პოპულარულია სერიალის ფანებში, განსაკუთრებით, ტიკტოკზე, სადაც ფრაზა ტრენდულ "საუნდადაც" იქცა. ობრისაც არაერთხელ გაუხმოვანებია ეს ცნობილი ფრაზა. ამჯერად კი, მისი საშუალებით დაქამინგაუთდა კიდეც.

"ბევრს ხუმრობენ, რომ გეი ვარ, მაშინ, როცა მართლა ვარ (ბისექსუალი)", — ასეთი მინაწერით გაუზიარა ვიდეო თავის 2,6 მილიონზე მეტ გამომწერს მსახიობმა და პრაიდის თვე მიულოცა.

@aubreyandersonemmons hehe happy pride month and to all a good night🤭 #modernfamily #lily #pridemonth #pride #fyp #bi ♬ original sound - clips___r___us

Modern Family ერთ-ერთი ყველაზე პოპულარული ამერიკული სიტკომია, რომელიც ერთმანეთთან დაკავშირებული სამი ოჯახის ცხოვრებაზე გვიყვება; ერთ-ერთია ლილის და მისი გეი მშობლების, მიჩელისა და კემერონის, ოჯახი. გეი წყვილის ყოველდღიურობის ასახვისთვის სერიალმა ლგბტქ ორგანიზაცია GLAAD-ის ორი ჯილდოც დაიმსახურა.

რაც შეეხება ანდერსონ-ემონსს, იგი სერიალს მესამე სეზონში შეუერთდა. ახლა უკვე 18 წლის ობრი მუსიკალურ კარიერასაც ესწრაფვის — სასცენო სახელით ფრენსის ანდერსონი, რამდენიმე კვირის წინ მან პირველი სინგლი გამოუშვა.

ასევე იხილეთ: