კათოლიკური ეკლესიის სულიერი წინამძღოლი, პაპი ფრანცისკე 21 აპრილს, 88 წლის ასაკში გარდაიცვალა. პონტიფის პოზიციაზე კონკლავმა ის 2013 წელს აირჩია პაპი ბენედიქტე მე-16-ეს ისტორიული გადადგომის შემდეგ. ფრანცისკე, ერისკაცობაში ხორხე მარიო ბერგოლიო, რომის 266-ე და პირველი ლათინოამერიკელი (არგენტინელი) პაპი იყო.

ფრანცისკეს პაპობის პერიოდი გამოირჩეოდა ეკლესიის მიერ სოციალურ სამართლიანობაზე, გარემოს დაცვასა და ინკლუზიურობაზე განსაკუთრებული ზრუნვით. ფრანცისკე კათოლიკური ეკლესიის გათანამედროვებასა და გაფართოებაზე ზრუნავდა, განსაკუთრებით კი ისეთი მარგინალიზებული ჯგუფების განუსჯელად მიღებაზე, როგორებიც არიან ემიგრანტები და LGBTQ+ თემის წარმომადგენლები.

პაპი ფრანცისკეს რწმენა უბრალოებასა და სიმარტივეს ემყარებოდა. მან თავიდანვე უარი თქვა რეგალიებსა და განსაკუთრებულ პრივილეგიებზე — ფრანცისკემ უარი თქვა პაპებისთვის განკუთვნილ მდიდრულ საცხოვრებელ ფლიგელზე და ვატიკანში მხოლოდ ორ ოთახს ფლობდა, ემოსა სადა, თეთრი ანაფორა და მორწმუნეთა ნაჩუქარ ძვირადღირებულ საჩუქრებს სრულიად ქველმოქმედებას სწირავდა.

წარმოგიდგენთ პაპი ფრანცისკეს ათ ციტატას, რომელიც მის მსოფლმხედველობასა და რწმენას ასახავს:

"მსურს ისეთი ეკლესია, რომელიც იქნება ღარიბი, ღარიბთათვის" — 2013 წლის მარტი.

"ვინ ვარ მე, რომ განვსაჯო?" — ფრანცისკეს პასუხი კითხვაზე, რას ფიქრობდა ლგბტქ+ თემის წევრებზე, 2013 წელი.

"მსურს, მღვდლებს შევახსენო, რომ აღსარებისას ადამიანს თავი საწამებელ ჯურღმულში კი არ უნდა ეგონოს, არამედ ღვთის შემწყნარებლობას უნდა გრძნობდეს," — პაპი ფრანცისკე 2016 წელს.

"გავაანალიზოთ, რომ ერთ გემზე ვართ, ყოველი ჩვენგანი მყიფე და თავგზააბნეულია, თუმცა ამავდროულად მნიშვნელოვანი და საჭირო. ყოველმა ჩვენგანმა ერთად უნდა მოვუსვათ ნიჩბები, რადგან თითოეულს გვჭირდება ერთმანეთის ზრუნვა," — პაპის სიტყვა კორონავირუსის დასრულებაზე ლოცვის დროს, 2020 წელი.

"ყველა ქმნილება ერთმანეთთანაა დაკავშირებული, ამიტომ თითოეულ მათგანს პატივისცემითა და სიყვარულით უნდა მივუდგეთ. ყველა ცოცხალი არსება ერთმანეთზე ვართ დამოკიდებულნი" — პაპი ფრანცისკეს წერილი 2015 წელს.

"ეს სამყარო მემკვიდრეობად ჩვენი წინაპრებისგან მივიღეთ, მაგრამ ასევე ვისესხეთ შემდეგი თაობებისგან, რომლებსაც ის ისეთივე უნდა დავუბრუნოთ, როგორიც ახლა გვაქვს," — პაპი ფრანცისკეს წერილი 2015 წელს.

"ჰომოსექსუალობა დანაშაული არაა" — პაპი ფრანცისკე The Associated Press-თან ინტერვიუში, იმ ქვეყნებზე საუბრისას, რომლებშიც ჰომოსექსუალობა კანონდარღვევად ცნეს.

"ომში ჩართულ მხარეებს მოვუწოდებ: შეწყვიტეთ ცეცხლი, გაათავისუფლეთ მძევლები და დაეხმარეთ მოშიმშილე ადამიანებს, რომლებსაც მხოლოდ მშვიდობიანი მომავალი სურთ" — პაპის საბოლოო სიტყვა ისრაელი-პალესტინის კონფლიქტზე, აღდგომის დღეს, 2025.