გვიან ღამით საქართველოს ექს-პრეზიდენტმა და ოდესის ყოფილმა გუბერნატორმა მიხეილ სააკაშვილმა უკრაინაში ლვოვის სასტუმრო დატოვა და უკან არ დაბრუნებულა, წერს ადგილობრივი გამოცემა Unian. მისი ადვოკატის თქმით, მან არ იცის სად არის მისი კლიენტი, თუმცა ფიქრობს, რომ ჩერნოვეცში გაემგზავრა. სამართალდამცავების ინფორმაციით, სააკაშვილს ლვოვის ოლქის ტერიტორია არ დაუტოვებია.

როგორც ადგილობრივი მედია იუწყება, სააკაშვილის დაცვის თქმით, ღამის გათენებას ის სასტუმროს ნომერში აპირებდა, თუმცა გვიან ღამით მან სასტუმრო საქმის გამო დატოვა.

13 სექტემბერიდან მიხეილ სააკაშვილი უკრაინაში ხალხთან შეხვედრას იწყებს. პირველი ქალაქი ჩერნოვეცი იქნება.

10 სექტემბერს სამართალდამცავების წინააღმდეგობის მიუხედავად უკრაინის ტერიტორიაზე მყოფმა სააკაშვილის მხარდამჭერებმა კორდონი გაარღვიეს და სააკაშვილი უკრაინის ტერიტორიაზე გადაიყვანეს. ამ ფაქტთან დაკავშირებით უკრაინაში გამოძიება უკვე დაიწყო. პირველი სასამართლო მოსმენა 18 სექტემბერსაა ჩანიშნული.

საქართველოს ექს-პრეზიდენტისა და ოდესის ყოფილი გუბერნატორის თქმით, მან საზღვარი გადმოკვეთა ლეგალური პასპორტით, რომელიც ავტობუსში დარჩა და ის ჩხრეკის დროს სამართალდამცავებმა "მოიპარეს".

მიხეილ სააკაშვილს უკრაინის მოქალაქეობა პრეზიდენტ პოროშენკოს გადაწყვეტილებით 26 ივლისს, ამერიკაში ვიზიტისას ჩამოერთვა.