26 მარტს, მესტიაში ზვავის ჩამოწოლას ერთი ტურისტის სიცოცხლე ემსხვერპლა.

გავრცელებული ინფორმაციით, დაღუპულია ქალი ტურისტი, რომელიც რამდენიმე ადამიანთან ერთად გიდის გარეშე სრიალებდა. ქალის თანმხლები პირები ზვავის ჩამოწოლის შედეგად არ დაშავებულან.

ამ ინფორმაციას მესტიის მუნიციპალიტეტის მერი, კაპიტონ ჟორჟოლიანიც ადასტურებს, რომელმაც BM.ge-ს განუცხადა, რომ 4 ალპინისტი უშგულში ალპინისტის გარეშე სრიალებდნენ, საიდანაც ერთი ალპინისტი ზვავს ემსხვერპლა, ხოლო დანარჩენები გადარჩნენ.

"უშგულში 4 ალპინისტი გიდის გარეშე სრიალებდა, საიდანაც ერთი ადამიანი ზვავს ემსხვერპლა და გარდაიცვალა. დანარჩენები, ზვავის გვერდით დარჩნენ და გადარჩნენ. დაზიანება მათ არ აღენიშნებათ", — ამბობს მესტიის მერი.