თურქეთში სტამბულის მერის დაკავებას საპროტესტო აქციები მოჰყვა.

Reuters წერს, რომ ოთხშაბათს სტამბოლის პოლიციის მთავარ სამმართველოსთან მომიტინგეებმა განაცხადეს, რომ პრეზიდენტ რეჯეფ თაიფ ერდოღანის მთავარი პოლიტიკური კონკურენტის და ქალაქის მერის ეკრემ იმამოღლუს დაკავება თურქეთის დემოკრატიისთვის დარტყმაა.

საპროტესტო აქცია გამართეს ასევე სტამბოლის უნივერსიტეტის სტუდენტებმაც და ოპოზიციონერი მერის, ეკრემ იმამოღლუს დიპლომის გაუქმება გააპროტესტეს. შესაბამისი კადრები სოციალურ ქსელში ქვეყნდება.

ვიდეოში ახალგაზრდებს ხელში უჭირავთ პლაკატები, რომელსაც პოლიციელების კორდონი აკავებს. ადგილი ჰქონდა შეტაკებას და პოლიციელების მხრიდან ძალის გამოყენებას.

შეგახსენებთ, რომ დღეს თურქმა სამართალდამცავებმა სტამბოლის მერი, ოპოზიციონერი ეკრემ იმამოღლუ დააკავეს. მას ბრალი კორუფციასა და ტერორისტების დახმარებაში ედება და საქმეში ასზე მეტი ადამიანია ჩართული.

Anadolu Agency-ის ცნობით, დაკავების ორდერი მერთან დაკავშირებულ 100-მდე პირზე, მათ შორის მის პრეს-მრჩეველ მურატ ონგუნზეც გამოიცა.

დაკავება არჩევნებამდე რამდენიმე დღით ადრე მოხდა. როგორც თურქული მედია წერს, მთავარ ოპოზიციურ რესპუბლიკურ სახალხო პარტიას (CHP) იმამოღლუ საპრეზიდენტო კანდიდატად უნდა დაესახელებინა. ერთი დღით ადრე, სტამბოლის უნივერსიტეტმა იმამოღლუს დიპლომი გაუუქმა, რითაც ფაქტობრივად პოპულარული ოპოზიციური ფიგურის საპრეზიდენტო არჩევნებიდან დისკვალიფიკაცია მოახდინა.

კრიტიკოსები აცხადებენ, რომ დაკავებები პოლიტიკურ ნიადაგზე მოხდა და სხვა არაფერია თუ არა ოპოზიციაზე ანგარიშსწორება გასულ წელს ადგილობრივ და მერის არჩევნებში ერდოღანის დიდი დამარცხების შემდეგ.