დიდი ბრიტანეთის ევროპის, ჩრდილოეთ ამერიკისა და ზღვისიქითა ტერიტორიების საკითხებში სახელმწიფო მინისტრმა, სტივენ დოუთიმ საქართველოში არსებულ ვითარებაზე ისაუბრა და ქვეყანაში შექმნილი პოლიტიკური კრიზისით ღრმა შეშფოთება გამოთქვა.

თემთა პალატაში სიტყვით გამოსვლისას დოუთიმ დაგმო მშვიდობიანი დემონსტრანტების ძალადობრივი დარბევა და, სხვა საკითხებთან ერთად, შეეხო ბიძინა ივანიშვილისა და მისი გარემოცვის სანქცირების საკითხებსაც.

"სერიოზულად ვარ შეშფოთებული საქართველოს ოფიციალური პირების მიერ მშვიდობიანი დემონსტრანტების ძალადობრივად დარბევით და, რა თქმა უნდა, ეს სრულიად მიუღებელია.

ამის პასუხად, საქართველოს მთავრობის დახმარება შევაჩერეთ, შევზღუდეთ თავდაცვითი თანამშრომლობა და შევზღუდეთ ქართულ ოცნებასთან ურთიერთობა. სავიზო აკრძალვები და სანქციები დავუწესეთ მათ, ვინც პასუხისმგებელია ძალადობაზე. ვაგრძელებთ საერთაშორისო პარტნიორებთან მუშაობას, რათა მხარი დავუჭიროთ ღია და თავისუფალ სამოქალაქო საზოგადოებასა და მედიას საქართველოში", — განაცახადა სტივენ დოუთიმ.

რაც შეეხება სანქციებს, მან განაცხადა, რომ სანქციები ბრიტანეთმა აშშ-სთან კოორდინაციაში უკვე დაუწესა შინაგან საქმეთა მინისტრ გოლმელაურსა და მის მოადგილე დარახველიძეს, დამატებით სამომავლო სანქციებზე კი კომენტარი არ გააკეთა, რადგან, მისი თქმით, ამის გაკეთება შეამცირებს სანქციებისგან მოსალოდნელ შედეგს.