რამდენად დიდი ხნის წინაც უნდა გენახა ფილმი მოსამსახურე, უთუოდ გემახსოვრება ერთ-ერთი სცენა, სადაც ოქტავია სპენსერის პერსონაჟი, მინი ჯექსონი, მდიდარ და რასისტ ჰილი ჰოლბრუკს შურის საძიებლად "შოკოლადის" ღვეზელს გამოუცხობს. სპოილერი! — სცენის კულმინაციაა მინის უკვე საკულტოდ ქცეული ფრაზა: "მიირთვი ჩემი მ**ნერი!". კი, "საიდუმლო ინგრედიენტი" სწორედ მოახლის ექსკრემენტი გახლდათ...

ამ როლმა ოქტავიას ოსკარიც მოუტანა, ფილმის გამოსვლიდან 14 წლის შემდეგ კი, როგორც ჩანს, მინი ჯექსონის დაბრუნების დრო დადგა.

სულ ახლახან სპენსერმა ინსტაგრამზე ფილმიდან კადრი გამოაქვეყნა — მინი ღვეზელით ხელში — და DOGE-ის თანამშრომლებსა და მხარდამჭერებს მიმართა. DOGE (აბრევ. "მთავრობის ეფექტიანობის დეპარტამენტი"), რომელსაც ილონ მასკი ხელმძღვანელობს, აშშ-ში ტრამპის ადმინისტრაციის მიერ შექმნილი დროებითი ორგანოა.

"ფასდაკლება ნამცხვრებზე ვაშინგტონში DOGE-ის ყველა თანამშრომლისა და მხარდამჭერისთვის", — დაწერა სპენსერმა ინსტაგრამზე, — "მჭირდება კარგი ვანილის ექსტრაქტი მექსიკიდან და კანადური ნეკერჩხლის სიროფი. ასევე სიმინდი, შოკოლადი და თქვენი დახმარება 'საიდუმლო ინგრედიენტის' მოსამზადებლად. შეთავაზება ერთჯერადია, რაოდენობა — შეზღუდული. ვის გაუგზავნიდით ამ ღვეზელს?".

სპენსერის პოსტს აღფრთოვანებული გამოეხმაურა მოსამსახურეში მასთან ერთად მონაწილე ოსკაროსანი მსახიობი ვაიოლა დევისიც. "ვკვდები სიცილით! შესანიშნავია", — დაწერა დევისმა კომენტარებში.

DOGE-ის შექმნის ინიციატივა ტრამპმა შარშან ნოემბერში წამოაყენა "ამერიკული ბიუროკრატიის დასაშლელად". ორგანიზაციის მისიად აშშ-ის პრეზიდენტმა "უსარგებლო ხარჯებისა და ჭარბი რეგულაციების შემცირება", ასევე "ფედერალური სააგენტოების რესტრუქტურიზაცია" დაასახელა. თუმცა, ფედერალური თანამშრომლების მასობრივად გათავისუფლებისა და არაკონსტიტუციურად მიჩნეული სხვა ქმედებების გამო, DOGE-ის წინააღმდეგ საპროტესტო ტალღა აგორდა და არაერთი სასამართლო დავაც დაიწყო.