ბათუმელების და ნეტგაზეთის დამფუძნებელმა და დირექტორმა, მზია ამაღლობელმა შიმშილობის 38-ე დღეს შიმშილობა შეწყვიტა. "ვივამედიდან" მზია ამაღლობელის გამოგზავნილი წერილი ბრიფინგზე "ბათუმელების" რედაქტორმა ეთერ თურაძემ წაიკითხა.

მზია ამაღლობელი წერს, რომ ექიმების დახმარებით შეეცდება კვების აღდგენას.

"ბათუმში ოცნების ქალაქში მომხდარი ტრაგედიის, ორი არასრულწლოვანი ბავშვის თხრილში ჩავარდნის და დაღუპვის ფონზე ჩემს ჯანმრთელობასა და სიცოცხლეზე წუხილის მოსმენა წარმოუდგენლად მძიმეა ჩემთვის. ამ დღეებში ექიმები დახმარებით შევეცდები, როგორმე შევძლო კვების აღდგენა. სინდისის პატიმრებს - თემურ ქათამაძეს, ნიკოლოზ ჯავახიშვილს მადლობა სოლიდარობისთვის. ვთხოვთ, მათაც შეწყვიტონ შიმშილობა. განსაკუთრებულ პასუხისმგებლობას ვგრძნობ ჩემი თანამოაზრეების, კოლეგების, მეგობრებისა და ოჯახის მიმართ. არ მინდა ჩემმა შიმშილობამ დაგასუსტოთ. თქვენ ჩემს ნაცვლადაც უნდა იბრძოლოთ" — წერს მზია ამაღლობელი კლინიკიდან გამოგზავნილ წერილში.

"ვივამედის" კლინიკასთან მყოფმა ნეტგაზეთის რედაქტორმა, ნესტან ცეცხლაძემ მადლობა გადაუხადა მზია ამაღლობელს შიმშილობის შეწყვეტისთვის. მისი თქმით, ახლა უფრო ძლიერები არიან იმისთვის, რომ იბრძოლონ როგორც მზიას, ისე ყველა პოლიტპატიმრის გათავისუფლებისთვის

"მე მინდა მადლობა ვუთხრა მზიას ამ გადაწყვეტილებისთვის. ჩვენ ახლა ბევრად ძლიერები ვართ, ვიდრე მანამდე. ძლიერები იმისთვის, რომ ვიბრძოლოთ როგორც მზიას, ისე ყველა პოლიტპატიმრის გათავისუფლებისთვის", — თქვა ნესტთან ცეცხლაძემ ბრიფინგზე.