იმ შემთხვევაში, თუ ექსკალიბურის შესახებ ლეგენდას ვირწმუნებთ, შეიძლება ვიფიქროთ, რომ ინგლისი ახალ დედოფალს იმსახურებს. საქმე ისაა, რომ შვიდი წლის ინგლისელმა გოგონამ იმ ტბაში, სადაც მეფე არტურმა (ლეგენდის თანახმად) თავისი მაგიური ხმალი გადააგდო, ექსკალიბურის მსგავსი მახვილი იპოვა.

მატილდა ჯონსი დოზმარის ტბაში ცურავდა, როცა წყლის ზედაპირზე მეტალის მყარი ნივთი შეამჩნია. ნივთი იმდენად ბრწყინავდა, რომ გოგონას ყურადღება მიიქცია და მასთან მიცურა. როგორც გაირკვა, ეს იყო 121 სანტიმეტრიანი ხმალი, რომელიც ძალიან ჰგავს ექსკალიბურს.

გოგონას მამა ჟურნალისტებთან ხმლის პოვნის ისტორიას იხსენებს:

„მატილდამ მითხრა, რომ ტბაში უზარმაზარ ხმალს ხედავდა. ვუთხარი ნუ სულელობ-მეთქი, მაგრამ ახლოს რომ მივედი, დავრწმუნდი, რომ ეს მართლაც უზარმაზარი ხმალი იყო, რომელიც ტბის ზედაპირზე დაცურავდა“, ამბობს მატილდას მამა.

როგორც ირკვევა, ოჯახმა 121 სანტიმეტრიანი ხმალი მას შემდეგ აღმოაჩინა, რაც მამამ მატილდასა და მის ოთხი წლის დას მეფე არტურის შესახებ ლეგენდა მოუთხრო.

გახსოვთ მეფე არტურის შესახებ თქმულება? ლეგენდის თანახმად, მეფე არტურს ჰქონდა ხმალი, რომელსაც ექსკალიბური ერქვა და მისი დახმარებით დიად საქმეებს ეჭიდებოდა და სამეფო ტახტის დასაბრუნებლად იბრძოდა. ამ ლეგენდის ერთ-ერთი ვერსიით, ხმალი მხოლოდ მას შეიძლება ჩაუვარდეს ხელში, ვინც ინგლისის ჭეშმარიტი სუვერენია. ლეგენდის თანახმად, მეფე არტურს მაგიური ხმალი ტბის დედოფალმა მისცა, ხოლო მას შემდეგ, რაც არტური სასიკვდილოდ დაჭრეს, მან ხმლის იმავე ტბაში გადაგდება ბრძანა. ლეგენდის ბოლოს, ექსკალიბური ტბაში უცნობმა ხელმა დაიჭირა და კაცმა არ იცის, რა ბედი ეწია მას.

ფოტო: Unknow

ამ ლეგენდის შესახებ 2017 წელს არაჩვეულებრივი ფილმი გადაიღო გაი რიჩიმ. მეფე არტური: ლეგენდა ხმალზე (King Arthur: Legend of the sword) - ასე ჰქვია ფილმს, რომელშიც მთავარ როლს კარგად ნაცნობი ჩარლი ჰანემი ასრულებს.

მართალია, ოჯახს არ სჯერა, რომ ისტორიული ხმალი აღმოაჩინეს, მაგრამ ფიქრობენ, რომ ეს ამბავი დიდი ხნის განმავლობაში ემახსოვრებათ და სიამოვნებით მოყვებიან მას სკოლაში, მეგობრებთან თუ სამსახურში.