დაღესტნელი კაცი მოსკოვის პოლიციას ელექტროშოკით წამებასა და იატაკის საწმენდით გაუპატიურებაში ადანაშაულებს — საქმეში დაღესტნის ლიდერი სერგეი მელიკოვიც ჩაერთო.

მაგომედ მაგომედოვი პოლიციამ 20 იანვარს, იარაღის არალეგალური წარმოების ბრალდებით დააკავა. მისი ადვოკატების თქმით, დაკავებიდან 3 დღის განმავლობაში მისი პოვნა ვერ შეძლეს.

მაგომედოვმა ადვოკატებს განუცხადა, რომ რაზვილკოვოს პოლიციის განყოფილების ოფიცრებმა მას ტელეფონის განბლოკვა და შესაბამისი აღიარების მიცემა მოსთხოვეს. უარის მიღების შემდეგ, მისი თქმით, სამმა ოფიცერმა მის წინააღმდეგ ელექტროშოკი გამოიყენა და იატაკის საწმენდის ტარით გააუპატიურეს. ასევე, მას დაემუქრნენ, რომ ასე მის ოჯახის წევრებსაც მოექცეოდნენ. მაგომედოვის თქმით, მისი წამების ნაწილი პოლიციამ გადაიღო.

მაგომედოვის დაზიანებების ფოტოები და მისი მონათხრობი ადვოკატებმა გამოაქვეყნეს, რის შემდეგაც საქმეში დაღესტნის მეთაური, სერგეი მელიკოვი ჩაერთო. მელიკოვმა საგამოძიებო კომიტეტის ხელმძღვანელს, ალექსანდრ ბასტრიკინსა და რუსეთის შინაგან საქმეთა მინისტრ ვლადიმირ კოლოკოლცევს სთხოვა, საქმე პირად კონტროლზე აიყვანონ.

მაგომედოვმა საგამოძიებო კომიტეტში საჩივარი 25 იანვარს შეიტანა და განაცხადა, რომ სამივე ოფიცრის ამოცნობა შეუძლია.

მიუხედავად წამების მტკიცებულებების წარდგენისა, მაგომედოვი წინასწარი დაკავების იზოლატორში დატოვეს, რადგან მის წინააღმდეგ საქმეა აღძრული იარაღის უკანონოდ შეძენა-შენახვის მუხლით.

სასამართლო მოსმენაზე მოსამართლემ ნება დართო დაცვის მხარეს, ეჩვენებინათ მაგომედოვის დაზიანებები. მან მიიღო მტკიცებულებად ხელის დაზიანება, ელექტროშოკის კვალი და მაგომედოვის სხეულიდან ამოღებული რეზინის ხელთათმანის ნაწილი.

პროკურორების განცხადებით, მაგომედოვს კავშირი ჰქონდა ისლამური სახელმწიფოს მხარდამჭერებთან, რომლებიც სირიაში ცხოვრობენ.

"ამ ინფორმაციის დასადასტურებლად სასამართლოს წინაშე არცერთი მტკიცებულება არ წარუდგენიათ. მაგომედის სახლის ჩხრეკისას არ ამოუღიათ არც ერთი მასალა, რომელიც მას ექსტრემიზმთან დააკავშირებდა. ჩვენ შევისწავლეთ ოქმები... დაახლოებით ასეთ რამეს ველოდით, თუმცა, ველოდით იმასაც, რომ სასამართლო კრიტიკულად შეხედავდა ანგარიშს ფაქტების გარეშე და მრავალი პროცედურული დარღვევებით", — განაცხადეს მაგომედოვის ადვოკატებმა.

მოსკოვის რეგიონის შინაგან საქმეთა სამინისტრომ უარყო, რომ მაგომედოვზე პოლიციამ იძალადა და აცხადებს, რომ ამას სამედიცინო ექსპერტიზაც ადასტურებს.

OC Media მაგომედოვის ადვოკატ ვლადისლავ ჟივაევს დაუკავშირდა, თუმცა მან ინტერვიუზე უარი განაცხადა.

რუსეთში დაკავებულთა და ტყვეთა წამებისა და გაუპატიურების შესახებ არაერთი ცნობა არსებობს. 2024 წლის თებერვალში ტახირჟონ ბაკიევმა, გაუპატიურებისა და ჯანმრთელობის მძიმე დაზიანების მიღების შემდეგ სიცოცხლე თვითმკვლელობით დაასრულა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.