გუშინ ცნობილი გახდა, რომ საჯარო რეესტრიდან, სავარაუდოდ, პოლიტიკური ნიშით 8 თანამშრომელი გაათავისუფლეს. ამის შესახებ თამუნა ჭითანავამ, მერი თაგოშვილმა, სალომე კაპანაძემ, ელზა გელაძემ, ნინო ხარჩილავა, ზურა გეგეშიძემ, ანა მამუკელაშვილმა და გიორგი შატაკიშვილმა სოციალურ ქსელში დაწერეს.

საჯარო რეესტრიდან გათავისუფლებული თანამშრომლების თქმით, მათი სამსახურიდან დათხოვნა, სავარაუდოდ, პოლიტიკური ნიშნით მოხდა და იმ პეტიციას უკავშირდება, რომელიც, ევროინტეგრაციის პროცესის შეჩერებასთან დაკავშირებით, "ოცნების" პრემიერის, ირაკლი კობახიძის განცხადებას ემიჯნება. საჯარო მოხელეებს ტელეფონით დაუკავშირდნენ და უთხრეს, რომ სააგენტო ხელშეკრულებას აღარ უგრძელებს.

მერი თაგოშვილი წერს, რომ არასამუშაო დროს სატელეფონო კომუნიკაციისა და მეილის საშუალებით ეცნობა, რომ საჯარო რეესტრსა და მას შორის გაფორმებული შრომითი ხელშეკრულების მოქმედების ვადა ამოიწურა

"საჯარო რეესტრთან შრომით ურთიერთობაში ვიმყოფებოდი 2 წელიწადზე მეტ ხანს.

დღეს კი, არასამუშაო დროს (21:08) სატელეფონო კომუნიკაციისა და მეილის საშუალებით მეცნობა რომ საჯარო რეესტრსა და ჩემს შორის გაფორმებული შრომითი ხელშეკრულების მოქმედების ვადა ამოიწურა და ორგანიზაცია დარჩენილი სამუშაოების მცირე მოცულობიდან გამომდინარე, მოკლებულია შესაძლებლობას გააფორმოს ახალი შრომითი ხელშეკრულება.

ხელშეკრულების არ/ვერ გაგრძელება კი,რა თქმა უნდა, უკავშირდება იმ პეტიციაზე ხელის მოწერას, რითაც საჯარო რეესტრის თანამშრომლები ვემიჯნებით ანტიევროპულ გადაწყვეტილებას", — წერს მერი თაგოშვილი სოციალურ ქსელში.

ელზა გელაძესაც ტელეფონით აცნობეს, რომ საჯარო რეესტრის ეროვნული სააგენტო მასთან ხელშეკრულებას აღარ გააგრძელებს.

"რამდენიმე საათის წინ სატელეფონო კომუნიკაციის საშუალებით დამიკავშირდნენ და მითხრეს, რომ საჯარო რეესტრის ეროვნული სააგენტო ჩემთან ხელშეკრულებას აღარ გააგრძელებს, რის მიზეზადაც ჩემი როგორც კადრის საჭიროების არ არსებობა დასახელდა. რა თქმა უნდა ამისი არავის სჯერა, როგორც ჩანს ამოქმედდა "კანონი შემცირებებთან" დაკავშირებით.

ერთ-ერთი პირველი ვიყავი ვინც მოაწერა ხელი პეტიციას რომლითაც ვგმობდით ძალადობას, ჩვენს თანამოქალაქეებზე და ვითხოვდით საქართველოს კონსტიტუციის 78-ე მუხლის აღსრულებას.

ჩემთან ერთად გაუშვეს არაერთი ადამიანი, მათ შორის ქუთაისის ოფისიდან, ვისაც ასევე ჰქონდა პეტიციაზე ხელი მოწერილი. ეს ყველაფერი მოხდა სრულიად გაუფრთხილებლად, ახალი წლის წინა ღამით. რა თქმა უნდა ვიბრძოლებ ბოლომდე, ჩვენი ევროპული მომავლისთვის და თუ ამის გამო უნდა ვიდევნებოდე, ესე იგი სწორი გზით მივლია აქამდეც.

მე ხვალ გავიღვიძებ ჩემს შვილთან ერთად და მისთვის თვალებში ჩახედვის არ შემრცხვება და თქვენ, რას მოუყვებით შვილებს?

და ბოლოს მივმართავ ჩემს ყოფილ კოლეგებს, ის რაც დღეს მოხდა არის კლასიკური დაშინებისა და რეპრესიების მაგალითი და თუ დღეს ამას ვინმე შეეგუება შემდეგი შეიძლება თვითონ იყოს !!!

წინ ევროპისკენ," — წერს ელზა გელაძე სოციალურ ქსელში.

საჯარო რეესტრიდან გათავისუფლებულ დანარჩენ თანამშრომლებსაც ზემოთ აღნიშნული პეტიციაზე ჰქონდათ ხელი მოწერილი და მათაც ტელეფონით აცნობეს ის, რომ ხელშეკრულებას ვეღარ გაუგრძელებდნენ:

"მეც მომილოცა საჯარო რეესტრის ეროვნული სააგენტო ახალი წელი და აღარ გამიგრძელა ხელშეკრულება, იმის გამო რომ ხელი მქონდა პეტიციაზე მოწერილი. არა რუსულ რეჟიმს! საქართველოს მომავალი ევროპაშია! " — წერს ზურა გეგეშიძე.

"დამიკავშირდნენ, საჯარო რეესტრიდან ხელშეკრულების არ გაგრძელების შესახებ.

ვინც არ მიცნობთ, გეტყვით რომ დასაქმებული ვიყავი მიწის სისტემურ რეგისტრაციაზე, თითქმის სამი წლის განმავლობაში. ამავე წლის ბოლოს, გავიარე რესერთიფიცირება წარმატებით (უძრავი ქონების ამზომველ-ამგეგმავის პოზიცია).

ხელშეკრულების არ გაგრძელებას ვუკავშირებ პეტიციას, რომელიც ემიჯნებოდა კობახიძის განცხადებას.

ჩემი პოზიცია, საქართველოს ევროკავშირში გაწევრიანების შესახებ, რჩება უცვლელი და მყარი," — წერს ნინო ხარჩილავა.

"რამდენიმე წუთის წინ სატელეფონო კომუნიკაციით მეცნობა, რომ საჯარო რეესტრის ეროვნულმა სააგენტომ შეწყვიტა ჩემთან შრომითი ხელშეკრულება, 2-წლიანი შრომის (ვინ მიცნობს რამხელა ცოდნა და ენერგია ჩავდე ჩემს სამუშაოში) შემდეგ სულ 24-წამიანი სატელეფონო საუბრით შემიწყვიტეს ე.წ "ხელშეკრულების ვადის ამოწურვის" მიზეზით.

აქვე დავძენ, რომ ერთ-ერთი ვიყავი იმ 400 ადამიანიდან ვინც მოაწერა ხელი პეტიციას, სადაც ვგმობდით ძალადობას ჩვენს თანამოქალაქეებზე.

ჩემთანმე ერთად გაუშვეს არაერთი ადამიანი. ვისაც ჩემსავით ჰქონდა პეტიციაზე ხელი მოწერილი

დიდი მადლობა რეესტრს ჩემი შრომის დაფასებისთვის", — წერს თამუნა ჭითანავა.

"რამდენიმე წუთის წინ სატელეფონო კომუნიკაციით მეცნობა, რომ საჯარო რეესტრის ეროვნულმა სააგენტომ შეწყვიტა ჩემთან შრომითი ხელშეკრულება, 2-წლიანი შრომის (ვინც მიცნობს, რამხელა ცოდნა და ენერგია ჩავდე ჩემს სამუშაოში) შემდეგ სულ 24-წამიანი სატელეფონო საუბრით შემიწყვიტეს ე.წ “ხელშეკრულების ვადის ამოწურვის” მიზეზით.

აქვე დავძენ, რომ ერთ-ერთი პირველი ვიყავი ვინც მოაწერა ხელი პეტიციას დიდი მადლობა რეესტრს ჩემი შრომის დაფასებისთვის," — წერს ანა მამუკელაშვილი სოციალურ ქსელში.

"საჯარო რეესტრის ეროვნულმა სააგენტომ ხელშეკრულება შემიწყვიტა. მიზეზი, რა თქმა უნდა, ჩემი ოპოზიციური განწყობაა, რუსული ხელისუფლების მიმართ. მო@%ანთ სიტყვისა და გამოხატვის თავისუფლება! და მაინც, საქართველო არასოდეს გახდება რუსეთი, საითაც ასე სწრაფად მიგვაქანებთ! წინ, ევროპული მომავლისკენ!" — წერს გიორგი შატაკიშვილი სოციალურ ქსელში.

"10-წლიანი შრომის შემდეგ, დღეს საჯარო რეესტრმა სამსახურიდან განმათავისუფლა! 20-წამიანია ზარით და 1 ტილიანი მეილით! მთელი ჩემი შრომა, წვალება და ჯაფა 1 წამში თავზე დამემხო... 10 წელი ხალხო 10 წელი...", — წერს სალომე კაპანაძე.