გაეროს ლტოლვილთა უმაღლესი კომისარიატის სამმართველომ წინასაპარლამენტო დებატებში ლტოლვილების მიმართ ქსენოფობიური განცხადებების გავრცელებაში ავსტრია დაადანაშაულა, წერს Reuters. ორგანიზაციამ პოლიტიკოსებს უფრო ინკლუზიური ტონის ჩამოყალიბებისა და ლტოლვილების დახმარებისკენ მოუწოდა:

"ბოლო წლებში ავსტრიამ ლტოლვილების მიღებისა და ინტეგრაციის კუთხით ბევრს მიაღწია. მაგრამ ამავე დროს, ჩვენ ვხედავთ ქსენოფობიურ დებატებსა და ლტოლვილების მიმართ უარყოფით ტენდენციებს. ჩვენ მოვუწოდებთ ყველა დემოკრატიულ პარტიას, რომ უფრო გააზრებულად ჩაატარონ პოლიტიკური დებატები და კონცენრტირდნენ იმაზე, რაც ხალხს გააერთიანებს და არა დაყოფს".

განცხადებაში, სადაც ქსენოფობიაში დადანაშაულებული პარტიები დასახელებული არაა, გამოყოფილია რეკომენდაციები, რათა ავსტრიამ ლტოლვილების მიმართ დამოკიდებულება გამოასწოროს. კომისრის განცხადებით, ლტოლვილების ხარჯზე პოლიტიკური დებატების წარმართვა უფრო აღვივებს ქსენოფობიას, ხოლო ბევრს უსაფრთხოებისა და ლტოლვილთა საკითხი ერთმანეთში ერევა.