მალე შეიძლება ისევ დავბრუნდეთ ვისტერია-ლეინზე!

ABC-ის გახმაურებული ტელესერიალის, სასოწარკვეთილი დიასახლისების, შემქმნელმა მარკ ჩერიმ გაამხილა, რომ ქალაქ ფერვიუში დაბრუნება თავადაც სურს. თანაც, სცენარისტისა და პროდიუსერის ჩანაფიქრით, სერიალის გაგრძელებაში მოქმედება სასოწარკვეთილი დიასახლისების სიუჟეტამდე რამდენი ათწლეულით ადრე უნდა განვითარდეს.

"ვისურვებდი, უფრო ადრეულ ათწლეულზე მომეყოლა", — აღნიშნავს ჩერი ჟურნალ People-თან ინტერვიუში, — "პერსონაჟი, რომელზე წერაც ყველაზე მეტად მენატრება, ვისტერია-ლეინია. ეს ტელევიზიის ისტორიაში ყველაზე სახალისო გადასაღები მოედანი იყო, რადგან ჩვენ მთელი ქუჩა გვეკუთვნოდა. ამ ქუჩას საკუთარი ხელისგულივით ვიცნობ. იქ რომ ვიღაც რეკლამას იღებს, ეგრევე ვცნობ, რადგან ყველა ეს სახლი და მათი განლაგება ვიცი. ძალიან საინტერესო იყო ამ ადგილზე წერა. ხანდახან კი ვფიქრობ, ნეტავ, როგორი იქნებოდა, ვთქვათ, 1966 წლის ვისტერია-ლეინზე წერა-მეთქი".

ჩერის თქმით, 70 ათასამდე ადამიანმა მაინც ჰკითხა, გააგრძელებს თუ არა სასოწარკვეთილ დიასახლისებს. პროდიუსერი კი ამბობს, რომ რამდენიმე იდეა აქვს, მაგრამ სერიალის გასაგრძელებლად ჯერ ის უნდა განისაზღვროს, "არის თუ არა მოსაყოლი ამბავი დარჩენილი".

"გაგრძელებას თუ აპირებ, ამისთვის სოლიდური შემოქმედებითი საფუძველი უნდა გქონდეს", — აცხადებს ჩერი, — "და ერთ დღესაც ვიღაცასთან ერთად ჩამოვჯდები იმის განსახილველად, გვაქვს თუ არა ასეთი მიზეზი ჩვენ".

ფოტო: ABC

დრამედიის (დრამისა და კომედიის ნაზავი) ჟანრის სერიალი სასოწარკვეთილი დიასახლისები მაყურებელმა პირველად 2004 წლის ოქტომბერში იხილა. რვა სატელევიზიო სეზონის განმავლობაში სერიალმა უსაზღვრო პოპულარობა და არაერთი პრესტიჟული ჯილდო, მათ შორის, რამდენიმე ემი და ოქროს გლობუსი, მოიპოვა.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…