კვირას, 3 ნოემბერს, ქართველმა ემიგრანტებმა ნიუ-იორკში, ტაიმს-სქვერზე აქცია გამართეს. ემიგრანტები 26 ოქტომბრის საპარლამენტო არჩევნების შედეგს აპროტესტებდნენ და დაფიქსირებული მნიშვნელოვანი დარღვევების სამართლიან გამოძიებას ითხოვდნენ. ასევე, ემიგრანტებმა მხარდაჭერა გამოუცხადეს 4 ნოემბერს თბილისში დაგეგმილ აქციას.

"ეს არჩევნები ცალსახად გაყალბდა, საქართველოში უკვე დიდი ხანია, დამყარებულია რუსული მმართველობა. ჩვენ ვითხოვთ, რომ ქართული ოცნება დათანხმდეს გამოძიების ჩატარებას დამოუკიდებელი გამომძიებლების მიერ და შეფასდეს, რამდენად დემოკრატიულად ჩატარდა ეს არჩევნები, რამდენად ლეგიტიმურია და რამდენად გამოხატავს ქართველი ხალხის ნებას ის შედეგები, რაც ცესკომ დაგვიდო", — განაცხადა ერთ-ერთმა დემონსტრანტმა.

აქციაზე შეკრებილმა საზოგადოებამ გააპროტესტა ანტიდასავლური საგარეო კურსიც, რომელსაც ქართული ოცნება მისდევს.

"ჩვენ ვიცით ერთი ძალიან კარგი ფრაზა — "მითხარი, ვინ არის შენი მეგობარი და გეტყვი, ვინ ხარ შენ". ჩვენი მეგობარი არის ევროპა და ჩვენი მეგობარი არის ამერიკა. ჩვენ არ გვინდა რუსეთში დაბრუნება და არასოდეს დავბრუნდებით", — განაცხადა აქციაზე მისულმა ერთ-ერთმა ემიგრანტმა.

ფოტო: NEWS.On.ge

ფოტო: NEWS.On.g

ფოტო: NEWS.On.ge

ფოტო: NEWS.On.ge