"არ ვაპირებთ პარლამენტში შესვლას" — ამის შესახებ ერთიანობა - ნაციონალური მოძრაობის თავმჯდომარე, თინა ბოკუჩავამ პრეზიდენტის სასახლესთან განაცხადა.

თინა ბოკუჩავას განცხადებით, ქართულმა ოცნებამ არჩევნები მოიპარა, ოპოზიცია კი მის აღიარებას არ აპირებს".

"ჩვენ ვიყავით პირველი, ვინც გავაკეთეთ განცხადება გუშინ, იმასთან დაკავშირებით, რომ გუშინდელი ისტორიული არჩევნები მოიპარა ივანიშვილმა, რომ ეს არის ქართველი ხალხის ნების ტოტალური უგულებელყოფა, რომ ადგილი ჰქონდა რეალურად რუსული ტიპის სპეცოპერაციას ქართველი ხალხის წინააღმდეგ, რომელმაც აირჩია ევროპული მომავალი და ივანიშვილმა მიიტაცა ეს გამარჯვება.

ბუნებრივია, როდესაც ვთქვით, რომ არ ვაღიარებთ საარჩევნო შედეგს, ეს, რა თქმა უნდა, თავისთავად გულისხმობს იმას, რომ არ ვაპირებთ პარლამენტში შესვლას. დარწმუნებული ვარ, რომ აღნიშნულთან დაკავშირებით საერთოდ კითხვის ნიშნებიც კი არ არსებობდა, როდესაც საუბარია ერთიანობა - ნაციონალურ მოძრაობაზე". — თქვა ბოკუჩავამ.

შეგახსენებთ, საპარლამენტო მანდატებზე უარს ამბობს კოალიცია ცვლილებისთვისაც. კოალიციის საარჩევნო სიის პირველი ნომრის, ნანა მალაშხიას თქმით, ისინი არ აპირებენ ქართველი ხალხის მოპარული ხმების ლეგიტიმაციას.