20 ოქტომბერს მოლდოვაში საპრეზიდენტო არჩევნები მიმდინარეობს — საარჩევნო უბნები თბილისის დროით 22:00 საათზე დაიხურება. არჩევნები ქვეყნის ისტორიისათვის განსაკუთრებით მნიშვნელოვანია იმიტომაც, რომ პრეზიდენტის არჩევის პარალელურად, მოლდოველები არჩევანს აკეთებენ იმასთან დაკავშირებითაც, უნდა ჩაიწეროს თუ არა ქვეყნის კონსტიტუციაში ევროკავშირში გაწევრება მიზნად.

უკრაინაში მიმდინარე ომის პარალელურად, მოლდოვა მოსკოვის გავლენებისგან გათავისუფლებას და ევროკავშირში გაწევრებას ცდილობს. წინასწარი გამოკითხვებით, მოქმედ პრეზიდენტს, მაია სანდუს მნიშვნელოვანი უპირატესობა აქვს 10 მოწინააღმდეგის წინააღმდეგ, თუმცა თუ 50%-იან ზღვარს ვერ გადალახავს, 3 ნოემბერს მე-2 ტური გაიმართება.

სანდუს მთავარი მოწინააღმდეგე პრორუსული სოციალისტური პარტიის მიერ მხარდაჭერილი ყოფილი გენერალური პროკურორი ალექსანდრ სტოიანოგლოა. ექსპერტები თანხმდებიან, რომ მეორე ტურის დანიშვნის შემთხვევაში, რეფერენდუმის შედეგები ძალიან ბევრ რამეს გადაწყვეტს — თუ მოსახლეობა ევროპულ გზას არ აირჩევს, ეს მაია სანდუს შანსებს მნიშვნელოვნად დააზიანებს.

მიუხედავად შიშებისა, რომ აქტივობა დაბალი იქნებოდა, სიტუაცია საგანგაშო არ არის. შუადღის სამი საათის მონაცემებით, არჩევნებზე ელექტორატის 32% იყო გამოცხადებული.