მოდით, ვაღიაროთ — ჩვენი შინაური ცხოველების "ენაზე" საუბარი ყველას გვსურს. ალბათ, არაერთხელ გისურვიათ, გაგეგოთ, რის თქმას ცდილობს თქვენი ძაღლი, როცა მრავლისმეტყველი მზერით გიყურებთ — წახემსება უნდა? გასეირნებას ითხოვს თუ მუცელზე მოფერებას?

თქვენი შინაური ცხოველების გაგება მათთან უფრო მყარი და ბედნიერი ურთიერთობის ჩამოყალიბების წინაპირობაა. ეს სტატიაც სწორედ ამის გამო მოგიმზადეთ — მართალია, კითხვის დამთავრებისას მთლად ყეფას ვერ შეძლებთ და ვერც თქვენს ცუგას აალაპარაკებთ ქართულად, მაგრამ მათი ჟესტებისა და ქცევის ქვეტექსტი უფრო გასაგები გახდება.

1. დააკვირდით ყველაფრის მთქმელ კუდს

თუ გგონიათ, რომ ქანქარა კუდი მხოლოდ იმის მანიშნებელია, რომ თქვენი ოთხფეხა მეგობარი ბედნიერია, ძალიან ცდებით! წარმოიდგინეთ, რომ კუდი ძაღლების "ემოჯია" — კუდის მოძრაობით მათი გაგება ძალიან მარტივი ხდება.

ნელი ქიცინი იმას ნიშნავს, რომ თქვენი ცუგა ნეიტრალურადაა განწყობილი იმის მიმართ, რაც ხდება. უბრალოდ მშვიდადაა და მოვლენების განვითარებას ელის.

აი, რაც შეეხება სწრაფ-სწრაფად, ვერტმფრენივით მოქიცინე კუდს, ეს ნამდვილად იმის დამადასტურებელია, რომ თქვენი ძაღლი რაღაცამ ძალიან აღაფრთოვანა. "მიყვარხარ! მიყვარს სიცოცხლე! ეს ჩემი ცხოვრების საუკეთესო დღეა!" — ქარიშხალივით მობზრიალე კუდით ჩვენი ბეწვიანი მეგობრები დაახლოებით ამის თქმას ცდილობენ.

დაბლა, ნელა მოქანავე კუდი კი ძირითადად იმის მანიშნებელია, რომ თქვენი ძაღლი რამეზე ნერვიულობს ან შფოთავს. შესაძლებელია, ამ დროს იმაზე ნერვიულობდეს, რომ მათ მიერ შეჭმული ფეხსაცმელი ან გაბდღვნილი ბალიში იპოვეთ...

2. დააკვირდით მათ ყურებს

ადამიანების ყურები მოსაბეზრებელია და მათ პატრონზე არაფერს გვეუბნება, მაგრამ ძაღლების ყურები მათ ხასიათსა და განწყობაზე იმაზე მეტ ინფორმაციას გვაწვდის, ვიდრე გგონიათ.

წინ წამოწეული ყურები — თქვენი საუკეთესო მეგობარი რაღაცამ დააინტერესა! "რა ხდება? ეს რა არის? გავეკიდო? შეიძლება, შევჭამო?" — ამ ჟესტით ძაღლები იმის თქმას ცდილობენ, რომ მათ მხედველობაში რაღაც საოცრად, სუპერ-დუპერ მიმზიდველად გამოიყურება!

ქვემოთ ჩამოზნექილი ყურებით ცუგები გვატყობინებენ, რომ რაღაცაზე წუხან და მობოდიშებას ცდილობენ. როცა მათი ყურები ასე სასაცილოდაა ქვემოთ ან უკან გადაწეული, უნდა დაასკვნათ, რომ თქვენი ძაღლი რაღაცას განიცდის.

თუმცა, როცა ერთ ყურს ზემოთ წევენ, მეორეს კი — ქვემოთ, იმას ნიშნავს, რომ სიტუაციის აწონ-დაწონას ცდილობენ და, შეიძლება, განგსჯიან კიდეც, რადგან ეს ჟესტი ძაღლურად ალმაცერად ყურების ეკვივალენტია.

3. ყეფის ხელოვნება

ძაღლები მილიონი სხვადასხვა მიზეზის გამო ყეფენ, თუმცა თუ სხვადასხვა ტიპის ყეფის ერთმანეთისგან განსხვავებას შევძლებთ, თითოეულის მნიშვნელობას მივხვდებით.

მოკლე, ხმამაღალი ყეფა იმის ნიშანია, რომ თქვენმა ძაღლმა უცხო ვინმე ან რამე დაინახა და თქვენი ყურადღების მიპყრობას ცდილობს. აი, ყმუილს კი რამდენიმენაირი ახსნა აქვს — შესაძლოა, ამ გზით შინაგანი მგლის გაღვიძებას ცდილობენ, ან გარეთ გაგონილ ხმაურს ეპასუხებიან, ან თავს მარტოსულად გრძნობენ... ყეფისა და ღრენის კომბინაცია კი გაფრთხილებად უნდა აღიქვათ. ამ დროს ძაღლები საერთოდ არ ხუმრობენ და იმუქრებიან.

4. ალოკვა = ძაღლურ კოცნას

ძაღლებს სიყვარულის გამოხატვის მრავალფეროვანი გზები აქვთ, რომელთაგან პატრონების ალოკვა ერთ-ერთი მთავარია. თუ თქვენი ძაღლი გლოკავთ, ეს იმას ნიშნავს, რომ ძალიან, ძალიან უყვარხართ, ან იმ საჭმლის სუნი მოეწონათ, რომელიც ახლახან მიირთვით...

5. კალთაში მოკალათება პირადულად უნდა მიიღოთ

თუ თქვენი ცუგა მოულოდნელად კალთაში გიჯდებათ ან ფეხებზე გეხახუნებათ ხოლმე, ეს იმას ნიშნავს, რომ თავის ადამიანად "მოგნათლათ". მორჩა, ამიერიდან თქვენ მისი პირადი ადამიანი ხართ, მისი სავარძელი! ამ გზით ისინი გვატყობინებენ, რომ მათი საყვარელი ქმნილებები ვართ!

შინაური ცხოველების მეგობრებს, ძაღლებისა და კატებისთვის საუკეთესო კვებისა და მოვლის შეთავაზებისთვის Petverse ეხმარება. Petverse ოთხფეხა მეგობრების ჰიპერპრემიუმ კლასის იტალიური საკვები ბრენდის, Farmina-სა და აქსესუარებისა და მოვლის საშუალებების ბელგიური ბრენდის, M-Pets-ის, დისტრიბუტორია საქართველოში. Farmina-ს ნუტრიციოლოგთან უფასო კონსულტაციით შეგიძლია შეურჩიო შენს ძაღლსა თუ კატას შესაბამისი საკვები. დაურეკე Farmina-ს ნუტრიციოლოგს ნომერზე: 032 211 20 12 ან ეწვიე Petverse-ის შოურუმს, მის: მერაბ კოსტავას #71.