28 Days Later-ის მეორე ნაწილი პირველი ფილმი გახდება, რომელსაც მთლიანად iPhone 15-ით გადაიღებენ. პოსტ-აპოკალიფსური საშინელებათა ჟანრის ფილმი, სახელწოდებით 28 დღის შემდეგ, პირველად 2002 წელს გამოვიდა. მასში მთავარ როლს ოსკაროსანი მსახიობი კილიან მერფი ასრულებს.

კულტურულ-სამეცნიერო ონლაინ სააგენტო Wired, ანონიმურ წყაროებზე დაყრდნობით წერს, რომ ფილმის სიქველს iPhone 15 Pro-ს დახმარებით იღებენ. თუ ეს სიმართლე აღმოჩნდება, მაშინ, 28 Days Later ახალ სიტყვას იტყვის კინოინდუსტრიაში, როგორც მობილური ტელეფონით გადაღებული ბლოკბასტერი.

Busindess Insider წერს, რომ ეს პრაქტიკა შესაძლოა ძალიან კარგი დასაწყისი აღმოჩნდეს ფილმის გადაღებისთვის საჭირო ხარჯების შემცირებისა და, შესაბამისად, დამწყები რეჟისორების ხელშეწყობისთვის.

ცნობისთვის, ეს პირველი შემთხვევა არაა, როდესაც სრულმეტრაჟიანი ფილმი მობილური ტელეფონით გადაიღეს. მაგალითად, შონ ბეიკერის მანდარინის (2015) გადასაღებად iPhone 5S გამოიყენეს. თუმცა მთლიანად მობილურით შექმნილი ბლოკბასტერი ჯერჯერობით არ არსებობს. რაც შეეხება 28 Days Later-ს, ფილმი დიდ ეკრანებზე 2025 წელს გამოვა.