კოალიცია ძლიერი საქართველოსა და გახარია საქართველოსთვის ლიდერებს შორის შეხვედრა დასრულდა. ტვ პირველის ცნობით, გიორგი გახარია და მამუკა ხაზარაძე ძველ თბილისში, ერთ-ერთ სასტუმროში ერთმანეთს ერთ საათზე მეტ ხანს ხვდებოდნენ. ტვ იმედის ინფორმაიციით, ხაზარაძე და გახარია ერთმანეთს სასტუმრო ოლდ თაუნში შეხვდნენ.

შეხვედრიდან გამოსულმა გიორგი გახარიამ მედიასთან კომენტარი არ გააკეთა.

"ქალბატონ სალომესთან (ზურაბიშვილთან) მიბრძანდით", — თქვა გიორგი გახარიამ.

უცნობია, შედგა თუ არა ლიდერებს შორის შეთანხმება. სალომე ზურაბიშვილი ძლიერი საქართველოსა და გახარია საქართველოსთვის ლიდერებს პრეზიდენტის ადმინისტრაციაში 18:00 საათზე ელოდება.

16 სექტემბერს, საქართველოს პრეზიდენტმა, სალომე ზურაბიშვილმა ორი პარტიის — პარტია გახარია საქართველოსთვის და კოალიცია ძლიერი საქართველოს, ლიდერები გაერთიანებაზე მოლაპარაკებების დასაწყებად პრეზიდენტის სასახლეში მოიწვია.

კოალიცია ძლიერი საქართველოს ლიდერი, მამუკა ხაზარაძე, პრეზიდენტის ინიციატივას იმავე დღეს გამოეხმაურა. ხაზარაძე დათანხმდა პრეზიდენტის მიწვევას, მაგრამ დასძინა, რომ მანამდე გიორგი გახარიასთან სურდა შეხვედრა.

გიორგი გახარიამ 17 სექტემბერს Facebook-ზე დაწერა, რომ მზადაა მოლაპარაკებებისთვის.