საჯარო რეესტრის განცხადებით, მიწის რეგისტრაციის სახელმწიფო რეფორმის ფარგლებში, ერთი წლის განმავლობაში ორასი ათასზე მეტმა მოქალაქემ მიწა საკუთრებაში დაირეგისტრირა.

ოფიციალური მონაცემებით, ამჟამად, საკუთრების აღიარებისთვის შესაბამის კომისიაში 16 ათასზე მეტი განცხადებაა გაგზავნილი, რვა ათასი მოქალაქის განცხადება შესწავლისა და განხილვის პროცესშია, 72 ათასამდე განცხადებაზე კი საჯარო რეესტრი, მოქალაქის ნაცვალად უფლების დამდგენ დოკუმენტაციას სხვადასხვა უწყებაში თავად იძიებს.

მიწის რეგისტრაციის სახელმწიფო რეფორმა 2018 წლის 1 ივლისამდე გრძელდება. მოქალაქეებს შეუძლიათ მიმართონ იუსტიციის სახლებს, საჯარო რეესტრის ტერიტორიულ სამსახურებსა და საზოგადოებრივ ცენტრებს.

მიწის რეგისტრაციის სახელმწიფო რეფორმა 2016 წლის პირველ აგვისტოს დაიწყო. საჯარო რეესტრის ცნობით, 90-იანი წლების შემდეგ ქვეყანაში არსებული მიწის ნაკვეთების მხოლოდ 25 პროცენტამდე იყო რეგისტრირებული.