ტაილანდში, პატარა ჰიპოპოტამმა უამრავი ადამიანის გული მოიგო. 2 თვის, მდედრობითი სქესის ჰიპო Moo Deng-მა, ქალაქ პატაიას მახლობლად მდებარე ზოოპარკში გულშემატკივრების რიგები დააყენა.

ზოოპარკის ხელმძღვანელობით განცხადებით, მას შემდეგ, რაც ივლისში პატარა ჰიპო დაიბადა, ვიზიტორთა რიცხვი გაორმაგდა.

თუმცა, იმის გამო, რომ ხანდახან ვიზიტორების ნაწილი ცუდად იქცევა და პატარა ჰიპოს აწუხებენ, ზოოპარკის დირექტორმა ხალხს კონტროლისა და სიფრთხილისკენ მოუწოდა.

ფოტო: BBC

"ამგვარი ქცევა არა მხოლოდ სასტიკია, არამედ საშიშიც. ჩვენ უნდა დავიცვათ ეს ცხოველები და უზრუნველყოთ მათთვის უსაფრთხო და კომფორტული გარემოს შექმნა" — განაცხადა ზოოპარკის დირექტორმა.

სოციალურ ქსელებში განთავსებული ვიდეოები აჩვენებს, რომ ზოგიერთი სტუმარი პატარა მძინარე ჰიპოს, გასაღვიძებლად კენჭებს ესვრის და წყალს ასხამს.

ზოოპარკმა გადაწყვიტა შესაბამისი ზომები მიეღო - დაამონტაჟა სათვალთვალო კამერები და ყველას, რომელიც პატარა ჰიპოს ცუდად მოექცევა, სამართლებრივად დასჯა ელის.

Moo Deng-ი ჯუჯა ჰიპოპოტამების ჯიშს მიეკუთვნება და კლასიფიცირებულია, როგორც "გადაშენების პირას მყოფი". ექსპერტები მიიჩნევენ, რომ ველურ ბუნებაში ჯუჯა ჰიპოპოტამების რიცხვი 3000-ზე ნაკლებია.