შუქრუთელები პარლამენტთან, ღია ცის ქვეშ მე-5 ღამეს ათევენ. დღეს მაღაროელების უწყვეტი პროტესტის 187-ე და შიმშილობის მე-15 დღეა. გაფიცულებიდან ხუთ მათგანს პირი აქვს ამოკერილი.

შუქრუთელების პროტესტს 14 სექტემბერს საქართველოს პარლამენტის თავმჯდომარე, შალვა პაპუაშვილი და პრემიერ-მინისტრი, ირაკლი კობახიძე გამოეხმაურნენ. პრემიერის თქმით, კომპანიის თანამშრომლებს და აქციის ორგანიზატორებს ათობით ათასი ლარის კომპენსაცია აქვთ აღებული.

"ჩვენ მოვიძიეთ ინფორმაცია ამ ადამიანებთან დაკავშირებით და ვინც არიან პროტესტის ორგანიზატორები, თითოეულ მათგანს ათობით ათასი ლარის კომპენსაცია აქვთ მიღებული კომპანიისგან. თუ რამე დამატებით არის საჭირო კომპანიისგან, ალბათ მოლაპარაკებები ამასთან დაკავშირებით წარიმართება. ეს არის ის ინფორმაცია, რაც გვაქვს. ჯერჯერობით კომპანიის საქმეა მოლაპარაკებების წარმოება", — აღნიშნა კობახიძემ.

პრემიერ-მინისტრის ბრალდებებს NEWS.On.ge-სთან სოფელ შუქრუთის მცხოვრებმა გიორგი ბიწაძემ უპასუხა. ბიწაძე ერთ-ერთია, რომელსაც უკვე 12 დღეა პროტესტის ნიშნად პირი აქვს ამოკერილი.

ბიწაძის თქმით, კომპანიამ რამდენიმე მათგანს გადაუხადა მხოლოდ ავანსი გადაუხადა. მაგალითად, პირადად მას 23 ათასი ლარი აქვს აღებული და ეს მაშინ, როცა მისი სახლი სრულად დანგრეულია.

პროტესტის მონაწილეებმა საქართველოს პარლამენტის შენობასთან 11 სექტემბერს გადმოინაცვლეს. მას შემდეგ, რაც პოლიციამ ადგილზე კარვების გაშლის საშუალება არ მისცა, ისინი ღია ცის ქვეშ ათევენ ღამეს.

შეგახსენებთ, რომ პარლამენტთან შეკრებილი აქციის მონაწილეები ჯორჯიან მანგანეზის საქმიანობის შედეგად სოფელ შუქრუთისთვის მიყენებული ზარალის ანაზღაურებას და პროცესში ცენტრალური ხელისუფლების ჩართვას ითხოვენ.