აზერბაიჯანში ვადამდელი საპრეზიდენტო არჩევნები გაიმართა. წინასწარი მონაცემებით არჩევნებში მოქმედი პრეზიდენტის, ილჰამ ალიევის პარტიამ ახალი აზერბაიჯანი გაიმარჯვა და საპარლამენტო უმრავლესობა მოიპოვა.

მმართველი პარტია ახალი მოწვევის პარლამენტში 125 ადგილიდან 69 დაიკავებს. წინა პარლამენტში ალიევის პარტიას 68 მანდატი ეკავა.

აღსანიშნავია, რომ ქვეყნის მთავარმა ოპოზიციურმა პარტიამ, აზერბაიჯანის სახალხო ფრონტის პარტიამ ვადამდელი საპარლამენტო არჩევნებს ბოიკოტი გამოუცხადა და გადაწყვეტილება იმით ახსნა, რომ არსებულ პირობებში არჩევნებში მათ მონაწილეობას აზრი არ ჰქონდა.

"არჩევნები ნაწილობრივ გამჭვირვალე მაინც რომ ყოფილიყო, ჩვენ მივიღებდით მონაწილეობას და გავიმარჯვებდით, მაგრამ აქ 1%-იანი გამჭვირვალობაც კი არ არის, რატომ უნდა მივიღოთ მონაწილეობა ამ არჩევნებში? — განაცხადა პარტიის თავმჯდომარის მრჩეველმა, მამედ იბრაჰიმმა.

ბოიკოტს შეუერთდა კოალიცია აზერბაიჯანის დემოკრატიული ძალების ეროვნული საბჭო. მათ არჩევნებს იაფი ფარსი უწოდეს, რომელში მონაწილეობაც, მათი შეფასებით, "არასაჭირო და საზიანოა ეროვნული ინტერესების თვალსაზრისით".

ცნობისთვის, პარლამენტი ილჰამ ალიევმა დეპუტატების თხოვნით მიმდინარე წლის ივნისში დაითხოვა და ვადამდელი საპარლამენტო არჩევნები დანიშნა.

წელსვე გაიმართა ვადამდელი საპრეზიდენტო არჩევნები, რომელზეც ილჰამ ალიევმა ხმათა უმრავლესობით გაიმარჯვა.