ეროვნული მუზეუმი გეგმავს, რომ ლევილის მამულში ქართული ოდა სახლი ჩადგას. სახლის ასაშენებლად კი ტენდერს აცხადებს. შესყიდვის სავარაუდო ღირებულება 2 680 353 ლარი იქნება.

"აქ მოეწყობა საქმიანი შეხვედრები ქართული ღვინით, კერძებით და სანიმუშო სერვისით. რესტორნის დარბაზი უმასპინძლებს 30 სტუმარს, ზაფხულის დარიან დღეებში ფართო აივანზე შესაძლებელი იქნება დამატებით 20-მდე ვიზიტორის მიღება-მასპინძლობა", — ნათქვამია სატენდერო დოკუმენტში.

პარიზთან ახლოს მდებარე ლევილის მამული საქართველოს საკუთრებაში 2016 წლიდან გადმოვიდა. მამულის ისტორია 1921 წლიდან იწყება, მაშინ როცა საქართველოს რესპუბლიკურმა მთავრობამ, ხელისუფლებაში ბოლშევიკების მოსვლის შემდეგ, თავშესაფარი საფრანგეთში მონახა და ეს მამული შეიძინა. მოლაპარაკებები საფრანგეთის ხელისუფლებასთან 1991 წლიდან მიმდინარეობდა.