"მთელი ცხოვრება მინდოდა, ლამაზი ვყოფილიყავი. მეგონა, ეს ყველაფერს შეცვლიდა", — ასე იწყებს თხრობას ნეტფლიქსის ახალი დისტოპიური ფილმის, მახინჯების, მთავარი გმირი, ტალი იანგბლადი.

იგი ცხოვრობს მომავლის სამყაროში, სადაც ყველა მოქალაქე ვალდებულია, როგორც კი 16 წლის გახდება, პლასტიკური ოპერაცია გაიკეთოს და "გალამაზდეს". ტალიც ამ მსოფლმხედველობით იზრდება, სანამ სისტემის დამალულ მანკიერ საიდუმლოებებს აღმოაჩენს და თავისი მეგობრის გადასარჩენად ბრძოლას დაიწყებს.

სკოტ ვესტერფელდის ამავე სახელწოდების ბესტსელერი რომანის ეკრანიზაციას მაყურებელი, დიდი მოლოდინის შემდეგ, სექტემბერში იხილავს, მანამდე კი შესაძლებლობა გვაქვს, ფილმის ტრეილერს შევავლოთ თვალი.

სკოტ ვესტერფელდის მახინჯები, რომელიც ოთხწიგნეულის პირველი ნაწილია, 2005 წელს გამოიცა. მწერლის თქმით, ინსპირაცია მისთვის მეგობრის მონაყოლი გახდა, რომელსაც სტომატოლოგმა ურჩია, პლასტიკური ოპერაცია გაეკეთებინა. ამდენად, ნაწარმოები ისეთ საკითხებს შეეხება, როგორებიცაა სილამაზის აღქმა და არარეალისტური სტანდარტები, პიროვნული თავისუფლების შეზღუდვისა და ინდივიდუალური იდენტობის დაკარგვის საფრთხე.

მახინჯები თანამედროვე მოზარდული (Young Adult) ლიტერატურის ერთ-ერთ საეტაპო წიგნად მიიჩნევა. მსოფლიოში მისი 8 მილიონზე მეტი ეგზემპლარია გაყიდული. რომანის ქართული თარგმანი 2018 წელს დაბეჭდა სულაკაურის გამომცემლობამ (მთარგმნელი ლელა ფიროსმანიშვილი).

ფოტო: Netflix

აღსანიშნავია, რომ მახინჯების ეკრანიზაციის უფლება ჯერ კიდევ 2006 წელს გაიყიდა, მაგრამ ფილმზე მუშაობა გაჭიანურდა. 2020 წელს კი კინოადაპტაციის უფლება ნეტფლიქსმა მოიპოვა. ფილმის რეჟისორია ჯოზეფ მაკგინტი ნიკოლი, იგივე McG, მთავარი როლის შემსრულებელი კი ჯოი კინგი გახლავთ.

"ეს ფილმი იმას შეეხება, რაც დღეს ჩვენს თავს ხდება", — ხსნის ნიკოლი, — "ბევრს, უბრალოდ, აღარ შეუძლია, ფოტო გადაიღოს და პირდაპირ გამოაქვეყნოს სოციალურ ქსელში. ფილტრი უნდა დაადო და დაამუშაო, რაღაც უნდა მოუხერხო, რომ სილამაზის იდეალიზებულ ვერსიად წარმოაჩინო. ჩვენი სათქმელი კი ესაა: 'ღრმად ჩაისუნთქე, საკუთარ თავს ჩაუღრმავდი, მიიღე შენი თავი ისეთი, როგორიც ხარ და ადამიანებიც ისეთები შეიყვარე, როგორებიც არიან'".

ნეტფლიქსზე მახინჯების პრემიერა 13 სექტემბერს შედგება.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...