სამოსის გერმანულმა ბრენდმა Adidas თავისი ახალი კამპანიის ერთ-ერთ სახედ ბელა ჰადიდის წარდგენის გამო მწვავე კრიტიკა დაიმსახურა. კომპანიამ მიუნხენის 1972 წლის ოლიმპიადისთვის დამზადებული წითელი სპორტული ფეხსაცმელი ხელახლა გამოუშვა და მის სარეკლამო კამპანიაში მოდელი ბელა ჰადიდიც გადაიღო.

საქმე ისაა, რომ მიუნხენის ოლიმპიადას ტრაგიკული ამბავი უკავშირდება: ღონისძიების მიმდინარეობისას, ოლიმპიურ სოფელში პალესტინელი ტერორისტები შეიჭრნენ და ისრაელის დელეგაციის 11 წევრი, მწვრთნელები და სპორტსმენები, დახოცეს. თავდასხმას ემსხვერპლა გერმანელი პოლიციელიც.

ჰადიდი კი, რომელიც ნახევრად პალესტინელია, ხშირად აკრიტიკებს ისრაელს. რამდენიმე წლის წინ მოდელი ისრაელმა "ებრაული სახელმწიფოს გაქრობის" მხარდაჭერაშიც კი დაადანაშაულა. ადიდასის ახალ კამპანიაში მის მონაწილეობას კი რამდენიმე ორგანიზაციის, ასევე ისრაელის მხრიდან უარყოფითი გამოხმაურება მოჰყვა.

ფოტო: Adidas

"შავბნელი ოლიმპიადის მოსაგონრად ანტი-ისრაელურად განწყობილი მოდელის გამოყენება ადიდასის მხრიდან ან დიდი უყურადღებობაა, ან მტრობის გამიზნულად გაღვივება. ორივე მიუღებელია", — განაცხადა ამერიკელ ებრაელთა კომიტეტმა, — "მოვუწოდებთ ადიდასს, ამ უპატიებელ შეცდომაზე კომენტარი გააკეთოს".

ანტისემიტიზმთან ბრძოლის მოძრაობამ კი ადიდასს მოუწოდა, ბოდიში მოეხადა და ჰადიდთან თანამშრომლობა დაუყოვნებლივ გაეწყვიტა.

"არჩევანის შეჩერება ჰადიდზე, რომელიც გამუდმებით ამწარებს ებრაელებს და თავს ესხმის ებრაულ სახელმწიფოს, ადიდასისთვის უკვე ცუდია, მაგრამ მისი ქცევა იმ ოლიმპიადის მოსაგონარი კამპანიის სახედ, სადაც ებრაელების სისხლი დაიღვარა, უბრალოდ, გულის ამრევია", — აცხადებს მოძრაობის ხელმძღვანელი საშა როიტმანი.

მას შემდეგ, რაც ადიდასის კრიტიკამ ინტერნეტი მოიცვა, კომპანიამ ჰადიდის ფოტოები სოციალურ ქსელებში წაშალა და მოიბოდიშა.

"ვიცით, რომ [კამპანია] ტრაგიკულ ისტორიულ მოვლენებთან დაკავშირდა — ეს სრულიად უნებლიედ მოხდა. ჩვენ ბოდიშს ვიხდით, თუკი ვინმე ავაღელვეთ ან შევაწუხეთ", — ნათქვამია ადიდასის განცხადებაში, — "შედეგად, კამპანიის დარჩენილ ნაწილს გადავხედავთ. გვჯერა, რომ სპორტს მსოფლიოს გაერთიანება შეუძლია, ჩვენ კი განვაგრძობთ მრავალფეროვნებისა და თანასწორობის ყოველმხრივ მხარდაჭერას".