ბოლო ინტერვიუში ზენდეიამ ტომ ჰოლანდთან ურთიერთობაზე ისაუბრა და Spider-Man:Homecoming-ის გადაღებების პერიოდი გაიხსენა, როცა მსახიობები 20-21 წლისები იყვნენ. მსახიობის თქმით, ძალიან ამაყობს იმით, როგორ გაუმკლავდა ტომი თავსდამტყდარ პოპულარობას.

საზოგადოება ზენდეიას სპაიდერმენის ფილმებამდე დისნეის როლებით იცნობდა, ტომის ცხოვრება კი სწორედ ამ როლმა შეცვალა.

"ორივე ძალიან პატარები ვიყავით, მაგრამ ჩემი კარიერა ასე თუ ისე უკვე დაწყებული იყო, ტომის ცხოვრება კი ერთ ღამეში შეიცვალა. ერთ დღეს ბავშვი იყო და მეგობრებთან ერთად ერთობოდა, მეორე დღეს კი სპაიდერმენი გახდა. ვუყურებდი, ტომის ცხოვრება მის თვალწინ როგორ იცვლებოდა, მაგრამ ამ ყველაფერს თავი შესანიშნავად გაართვა", — აღნიშნავს მსახიობი.

ტომ ჰოლანდი მაისიდან ლონდონის თეატრის სცენაზე სპექტაკლში რომეოს როლს შეასრულებს. ზენდეიას თქმით, შეეცდება, რაც შეიძლება მეტ სპექტაკლს დაესწროს და ტომი თეატრში ხშირად ნახოს.

მსახიობმა ის დღეც გაიხსენა, როდესაც 2022 წელს ტომთან ერთად პაემანზე პარიზში, ლუვრის მუზეუმში, წავიდა. ზენდეიას თქმით, წინასწარ გააფრთხილეს, რომ მუზეუმში ისედაც ძალიან ბევრი ხალხი იყო და მისვლა არ ღირდა, თუმცა ეს მაინც გააკეთა. რა თქმა უნდა, წყვილის ფოტოები ლუვრიდან მალევე გავრცელდა.

"საბოლოოდ, ლუვრში სტუმრობამ კარგად ჩაიარა. იმ ფაქტს ეჩვევი, რომ შენც მუზეუმის ერთ-ერთი ექსპონატი ხარ, რომელსაც ფოტოებს უღებენ. ვცდილობ, ეს დავაიგნორო და ცხოვრება გავაგრძელო", — ამბობს ვარსკვლავი.

მსახიობმა პოპულარობის დადებითი მხარეც ახსენა და თქვა, რომ ლუვრის ადმინისტრაციამ ნება დართოთ, მუზეუმის დახურვის შემდეგაც დარჩენილიყვნენ და ექსპონატები დამთვალიერებლების გარეშე ენახათ, რაც ძალიან კარგი გამოცდილება იყო და თავი ფილმში ღამე მუზეუმში ეგონა.

ზენდეია და ტომი ერთმანეთს უკვე 3 წელზე მეტია ხვდებიან, თუმცა ურთიერთობის დეტალებს საზოგადოებას ძალიან იშვიათად უზიარებენ. გულშემატკივრები დიდხანს ეჭვობდნენ, რომ სპაიდერმენის ვარსკვლავები რეალურ ცხოვრებაშიც ერთად იყვნენ. საბოლოოდ, ზენდეიამ და ტომმა გამოცემა GQ-სთან ინტერვიუში აღიარეს, რომ ერთმანეთს ხვდებიან და მათი ურთიერთობაც ოფიციალურად დაადასტურეს.

მოგვიანებით, ტომი და ზენდეია Spider-Man: No Way Home-ის პრემიერაზე წყვილის სტატუსით გამოჩნდნენ. ამის შემდეგ მათ შორის უამრავი გულისამაჩუყებელი მომენტის მომსწრენიც გავხდით.

ამავე თემაზე: