რა ხდება: ტაივანში არჩევნებამდე 3 კვირაა დარჩენილი, ქვეყნის ხელისუფლება აცხადებს, რომ კუნძულის გარშემო ჩინეთის სამხედრო თვითმფრინავები და ხომალდები დააფიქსირეს.

დეტალები: ტაივანის თავდაცვის სამინისტრომ განაცხადა, რომ დღეს, ადგილობრივი დროით 13:30 საათიდან, დააფიქსირეს J-10, J-11 და J-16 ავიაგამანადგურებლები, რომლებიც დაფრინავდნენ ტაივანის ჩრდილოეთ, შუა და სამხრეთ-დასავლეთის საჰაერო სივრცეში.

  • ათმა თვითმფრინავმა გადაკვეთა ტაივანის სრუტის მედიანური ხაზი და მიმდებარე ტერიტორიები.
  • მედიანური ხაზი, ოდესღაც, არაოფიციალური ბარიერის ფუნქციას ასრულებდა ორ მხარეს შორის, მაგრამ ჩინური თვითმფრინავები ახლა რეგულარულად დაფრინავენ მის თავზე.
  • სამინისტროს ინფორმაციით, ტაივანმა მონიტორინგისთვის საკუთარი ძალები გაგზავნა.

ასევე ნახეთ: ჩინეთის 50-ცენტიანი არმია მსოფლიოში ყალბ ამბებს ავრცელებს — რისთვის უნდა ვიყოთ მზად

არჩევნები და დაძაბული ურთიერთობა ჩინეთთან: დემოკრატიული მმართველობის მქონე ტაივანი, რომელსაც ჩინეთი საკუთარ ტერიტორიად მიიჩნევს, უკვე ოთხი წელია აპროტესტებს ჩინეთის რეგულარულ სამხედრო პატრულირებას და წვრთნებს კუნძულთან ახლოს.

  • ჩინეთს ტაივანის მახლობლად სამხედრო მოქმედებების შესახებ კომენტარი არ გაუკეთებია. პეკინმა ადრე გააცხადა, რომ მსგავსი მოქმედება მიზნად ისახავს ტაივანის სეპარატისტებსა და შეერთებულ შტატებს შორის "შეთქმულების" თავიდან აცილებას და ჩინეთის ტერიტორიული მთლიანობის დაცვას.

///

ტაივანში საპრეზიდენტო და საპარლამენტო არჩევნებისთვის ემზადებიან, რომელიც 13 იანვარს გაიმართება. ჩინეთთან ურთიერთობა ქვეყნისთვის ყველაზე სადავო საკითხია.

  • ტაივანის მთავრობა, რომელმაც არაერთხელ შესთავაზა მოლაპარაკება ჩინეთს, უარყოფს პეკინის პრეტენზიებს სუვერენიტეტთან დაკავშირებით და ამბობს, რომ მხოლოდ კუნძულის მოსახლეობას შეუძლია გადაწყვიტოს თავისი მომავალი.

საზოგადოებრივი აზრის გამოკითხვების თანახმად, ტაივანის პრეზიდენტის პოსტზე ყველაზე მეტი მხარდამჭერი მმართველი დემოკრატიული პროგრესული პარტიის ლიდერს, ლაი ჩინგ-ტეს ჰყავს. პეკინი მას სეპარატისტად მიიჩნევს.

  • ტაივანის მთავარი ოპოზიციური პარტია, კუომინტანგი, ტრადიციულად, მხარს უჭერს მჭიდრო კავშირებს პეკინთან და პირობას დებს, რომ განაახლებს დიალოგს ჩინეთთან, თუ ის არჩევნებში გაიმარჯვებს. თუმცა, პარტია, ასევე, აღნიშნავს, რომ ტაივანელი ხალხი ერთადერთია, ვისაც შეუძლია გადაწყვიტოს საკუთარი მომავალი.