დღეს, 13 ივლისს, ბათუმში, სასტუმრო ჰილტონში მიმდინარე მე-14 საერთაშორისო კონფერენციისას, საქართველოს თავდაცვის მინისტრმა, ლევან იზორიამ განაცხადა, რომ რუსეთთან პირდაპირი დიალოგის ფორმატი "ამ ეტაპზე გამორიცხულია", იმ ქმედებებიდან გამომდინარე, რომელიც მიმდინარეობს:

"რუსეთი აგრძელებს ქმედებებს, რომელიც ეწინააღმდეგება საერთაშორისო სამართლის ნორმებს. ეწინააღმდეგება ჩვენი ქვეყნის სუვერენიტეტს. ის საერთაშორისო ფორმატები, რომელიც არსებობს, ვფიქრობთ, რომ სწორედ ამ ფორმატების ფარგლებში, უნდა გაგრძელდეს დიალოგი და იმ კონკრეტულის შედეგს მივაღწიოთ, რასაც ჰქვია ჩვენი ქვეყნის დეოკუპაცია".

აღნიშნული კომენტარით, თავდაცვის მინისტრი რუსეთის საგარეო საქმეთა მინისტრის, სერგეი ლავროვის განცხადებას გამოეხმაურა.

გუშინ, 12 ივლისს, ლავროვმა ბელგიის საგარეო საქმეთა მინისტრთან გამართულ ერთობლივ პრესკონფერენციაზე განაცხადა, რომ რუსეთი მზადაა სხვადასხვა დონეზე დაამყაროს კონტაქტები საქართველოსთან.

სასტუმრო ჰილტონში მე-14 საერთაშორისო კონფერენცია - საქართველოს ევროპული გზა - რეგიონული სტაბილურობის უზრუნველყოფა, დღეს გაიხსნა და 14 ივლისის ჩათვლით გაგრძელდება.