ჩინეთის ერთ-ერთ ზოოპარკს ამჯერად რეალური დათვების ცხოველად გადაცმული ადამიანებით ჩანაცვლებაში ადანაშაულებენ. ეს ეჭვები რამდენიმე ვიდეოს მოჰყვა, რომლებშიც ჩანს, როგორ დგას დათვი ორ ფეხზე, გამვლელებს ხელს უქნევს და ყირაზე დგება, ზოგიერთ ადგილას კი ბეწვიც კი აკლია. ზოოპარკი ამ ფაქტს უარყოფს და ამბობს, რომ ვიდეოში მზის, იგივე მალაიური დათვის ჯიში ჩანს, რომელიც მცირე ზომისაა, ბრალდებას კი ადამიანების არასაკმარის ინფორმირებულობას მიაწერს.

განცხადებას ზოოპარკი პირველ პირში, დათვის სახელით ავრცელებს და წერს:

"მე ანჯელა ვარ, მზის ჯიშის დათვი. დღეს, სამსახურის შემდეგ, ზოოპარკის დირექტორმა დამირეკა და მკითხა, ხომ არ ვიზარმაცე, სამსახური გავაცდინე და ჩემი ჩანაცვლება ადამიანს ხომ არ მოუწია. შეგახსენებთ, რომ მე არც მურა დათვი და არც ძაღლი, მზის დათვი ვარ", — ვკითხულობთ განცხადებაში.

მიუხედავად ამისა, ჩინეთის ზოოპარკს ადამიანები სიტყვაზე აღარ ენდობიან, რადგან მსგავსი შემთხვევა პირველი სულაც არაა. მაგალითად, საზოგადოებამ ისინი მასხრად მაშინაც აიგდო, როცა ძაღლების გარეულ ცხოველებად გასაღებას ცდილობდნენ — ზოოპარკის სტუმრებს ძალიან გაუკვირდათ, როდესაც ერთ-ერთ გალიაში ნახეს, როგორ ყეფდა "ლომი".

იხილეთ ასევე: