Warner Bros-ის ახალ ფილმში ლეგენდარული ვილი ვონკა ბრუნდება! Wonka-ში მის როლს ტიმოთი შალამე შეასრულებს. ეს ეკრანიზაცია პერსონაჟის ახალგაზრდობაზე მოგვითხრობს იმ დრომდე, სანამ ის ცნობილ შოკოლადის ქარხანას გახსნიდა.

ახალი ფილმი მიუზიკლი იქნება, შესაბამისად, ფილმში ტიმოთი შალამეს სიმღერისა და ცეკვის ნიჭით ტკბობის შესაძლებლობაც მოგვეცემა. ფილმის რეჟისორი პოლ კინგია. სცენარზე კინგთან ერთად საიმონ ფარნაბიმ იმუშავა. Wonka ვილი ვონკას ისტორიის მესამე ეკრანიზაციაა. 1971 წელს გამოსულ ფილმში მთავარი გმირის როლს ჯინ უაილდერი ასრულებდა, 2005 წლის ფილმში კი — ჯონი დეპი.

ახალგაზრდა და უფულო ვილი ვონკა, როგორც ჩანს, მსოფლიოს შემოვლას, სხვებისთვის საკუთარი შოკოლადის რეცეპტის გაცნობასა და მსოფლიოში საუკეთესო შოკოლადის ქარხნის შექმნას გეგმავს. პადინგტონის რეჟისორი გვპირდება, რომ ფილმში ვონკას პერსონაჟთან დაკავშირებით ჩვენს ისეთ კითხვებსაც კი გაეცემა პასუხი, რომლებზეც არასოდეს გვიფიქრია რომ გვქონდა.

Wonka-ში ტომოთისთან ერთად ისეთ ცნობილ მსახიობებს შევხვდებით, როგორებიც არიან: სალი ჰოუკინსი, ოლივია კოლმანი, ჰიუ გრანტი და სხვები. რეჟისორის თქმით, უნდოდა, ვილი ვონკას ქარხნის ერთ-ერთი ბოროტი და ცინიკური თანამშრომლის როლი რომელიმე ვარსკვლავს მოერგო, რისთვისაც ჰიუ გრანტი ზედგამოჭრილი აღმოჩნდა.

კინგმა ასევე მადლიერება გამოხატა ტიმოთის მიმართაც, რადგან ფილმის გადაღებები რამდენიმე წელი გაგრძელდა, ბევრი სცენა კი შალამესგან ცეკვა-სიმღერას ითვალისწინებდა, რასაც თავი შესანიშნავად გაართვა. ფილმის პრემიერა 15 დეკემბერს შედგება.

ნახეთ ტრეილერი:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...