ვენესუელის პრეზიდენტმა ნიკოლას მადურომ უზენაესი სასამართლოს შენობაზე შვეულმფრენიდან ყუმბარების სროლასა და ცეცხლის გახსნას შეიარაღებული ტერორისტული თავდასხმა უწოდა. ინფორმაციას CNN ავრცელებს.

მადუროს თქმით, ყუმბარები არ აფეთქდა და არავინ დაშავებულა. ინფორმაციისა და კომუნიკაციის მინისტრმა კი თავდასხმას გადატრიალების მცდელობა უწოდა.

თავდასხმის შემდეგ, კაცმა, რომელიც თავის თავს ოსკარ პერესს უწოდებს, ინსტაგრამზე ვიდეოები გამოაქვეყნა, სადაც განაცხადა, რომ ის ემიჯნება ვენესუელის "კრიმინალურ მთავრობას". მან პრეზიდენტ ნიკოლას მადუროს გადადგომა მოითხოვა.

პერესმა განაცხადა, რომ ის იმ შვეულმფრენის პილოტია, რომელიც სასამართლოს დაესხა თავს. მან განაცხადა, რომ ყუმბარები სასამართლოს დაცვისკენ იყო მიმართული, ხოლო 15 გასროლა შინაგან საქმეთა მინისტრისთვის "იყო გამიზნული".

ვენესუელაში უკვე რამდენიმე თვეა კრიზისია. ქვეყანა უკიდურეს სიღარიბეშია ჩაფლული, არის საკვების დეფიციტი, რაც მოსახლეობაში უკმაყოფილებას იწვევს. ეკონომიკურ პრობლემებს ემატება ვენესუელას ხელისუფლების ავტორიტარული მართვის სტილი. ბოლო თვეებში, საპროტესტო აქციებისას, რამდენიმე ათეული ადამიანი დაიღუპა და დაშავდა.