ფლორიდელი დედის ცხოვრება ერთ დღეში რადიკალურად შეიცვალა: მას შემდეგ, რაც შვილმა სიმსივნის წინააღმდეგ მკურნალობის ბოლო კურსი ჩაიტარა, დედამ ლატარიის ბილეთი შეიძინა და $2 მილიონი მოიგო.

ჯერალდინმა ლატარიის ბილეთის ყიდვა ერთ-ერთ გაზგასამართ სადგურზე გაჩერებისას გადაწყვიტა. "თავიდან ბენზინგასამართი სადგურის თანამშრომელს ეგონა, რომ ყველა ბილეთი გაყიდული იყო, მაგრამ ვთხოვე, რომ კიდევ გადაემოწმებინა. მან გადაამოწმა და მითხრა, რომ მხოლოდ ერთი იყო დარჩენილი", — იხსენებს ლატარიის გამარჯვებული.

ეს სწორედ ის ბილეთი აღმოჩნდა, რომლითაც ჯერალდინმა 2 მილიონი დოლარი მოიგო. "სანამ დედა ბილეთს იყიდდა, ზუსტად წინა დღეს დავასრულე მკერდის სიმსივნის მკურნალობა და საავადმყოფოდან გამომწერეს. დედამ მთელი თავისი დანაზოგი იმისთვის დახარჯა, რომ გამოვჯანმრთელებულიყავი და ჩემზე ეზრუნა", — ამბობს ჯერალდინის შვილი.

რაც შეეხება ბილეთს, რომლითაც ფლორიდელმა დედა-შვილმა თანხა მოიგო, ის 10 დოლარი ღირს. იღბლიანი ბილეთის მეშვეობით 8 პრიზის მოგებაა შესაძლებელი და მათგან ერთ-ერთი 2 მილიონი დოლარია. ჯერალდინის თქმით, მან მოგებული თანხის ერთიანად მიღება გადაწყვიტა.