ამის შესახებ ისინი განცხადებას ავრცელებენ.

რატომ არის მნიშვნელოვანი: გულშემატკივრები ითხოვენ, კაჭარავამ რაგბის კავშირის გამგეობის თავმჯდომარის პოსტი დატოვოს.

• დავით კაჭარავა პრორუსული, ანტიდასავლური და ქართული ოცნებისგან ფორმალურად გამიჯნული ხალხის ძალის დეპუტატია.
• მის გადადგომას რაგბის ქომაგები სწორედ იმის გამო ითხოვენ, რომ მშვიდობიანი საპროტესტო აქციების დარბევის შემდეგაც მან მხარი არ დაუჭირა რუსული კანონის ჩაგდებას.
• გულშემატკივრების თქმით, არ დავიწყებიათ ის გულისწყვეტა, სირცხვილის, უხერხულობისა და იმედგაცრუების შეგრძნება, როცა კაჭარავას წასვლით გულნატკენებმა, სპორტსმენი მეორე დღესვე ქართული ოცნების პარტიულ სიაში ნახეს.

დეტალები: რაგბის კავშირი ამბობს, რომ მათი პოლიტიკურ-პარტიულ დაპირისპირებაში ჩათრევის სისტემური და მიზანმიმართული მცდელობაა და ამის გამო წუხილს გამოთქვამენ.

• მათი თქმით, ეს პროცესი მას შემდეგ დაიწყო, რაც ქართულმა რაგბიმ მსოფლიო ასპარეზზე ისტორიულ გამარჯვებებს მიაღწია.
• "პირველად შეძლო 6 ერის წევრი ქვეყნების დამარცხება, რაგბის კავშირში განხორციელებული რეფორმებისა და მიმდინარე სწორი კურსის გამო უმაღლესი შეფასება დაიმსახურა მსოფლიო რაგბის პრეზიდენტისგან", — ნათქვამია განცხადებაში.
• ამბობენ, რომ ქართული რაგბი არაერთხელ მოექცა საერთაშორისო მედია საშუალებების ფოკუსში და შედეგად ქართული დროშა ახალ სიმაღლეზე ასწია.
• "მთელ მსოფლიოს დაანახა ქართულ რაგბიში მიმდინარე სწრაფი აღმასვლა როგორც კავშირის ადმინისტრაციის, მთავრობისა და ექს-პრემიერ ბიძინა ივანიშვილის საქველმოქმედო მხარდაჭერის შედეგი", — ამბობს რაგბის კავშირი.
• მათი განცხადებით, სწორედ ეს გახდა ოპოზიციურად განწყობილი ჯგუფების გაღიზიანებისა და აგრესიის მიზეზი და ამის შედეგად იქცა ქართული რაგბი მათი შეტევების სამიზნედ.
• ამბობენ, რომ დასანანია, როცა ქართულ სპორტს, საქართველოს მსოფლიო წარმატებას ოპოზიციურად განწყობილი ცალკეული ჯგუფები პირადი ინტერესების საწინააღმდეგოდ მიიჩნევენ და ცდილობენ ქართული რაგბის რეპუტაციის შელახვას.

გარდა ამისა, რაგბის კავშირი ამბობს, რომ გამგეობის თავმჯდომარის არჩევა ბოლოდროინდელი რეფორმების შედეგად, არის სრულიად გამჭვირვალე, დემოკრატიული, ხმათა უმრავლესობაზე დაფუძნებული გადაწყვეტილება.

• განმარტავენ, რომ საერთო ყრილობამ, რომელიც რაგბის კლუბების წარმომადგენლებისგან შედგება, აირჩია გამგეობის 13 წევრი, რომლებმაც თავმჯდომარედ ღია კენჭისყრით აირჩიეს დავით კაჭარავა.
• "არანაირ რაგბის გულშემატკივართა პეტიციას არ აქვს რაიმე ლეგიტიმაცია დემოკრატიული არჩევნების ამ სისტემის ფონზე, რაც დარწმუნებული ვართ, მისმა ინიციატორმა ანონიმუსმაც იცის, თუმცა ამ გზით ქართული რაგბის დისკრედიტაციას ემსახურება", — ნათქვამია განცხადებაში.
• ისინი პოლიტიკურ დაჯგუფებებს მოუწოდებენ, რომ თავი შორს დაიჭირონ ქართული რაგბისგან და ნუ ცდილობენ პირადი პოლიტიკურ-მერკანტილური მიზნებისთვის ქართული რაგბის, საქართველოს ღირსების დაკნინებას.