სულ ცოტა ხნის წინ შედგა იმ სიმღერის პრემიერა, რომელიც საქართველოს 2022 წლის საბავშვო ევროვიზიის სიმღერის კონკურსზე წარადგენს. სიმღერას, სახელწოდებით მჯერა, 12 წლის მარიამ ბიგვავა სომხეთის დედაქალაქში დაგეგმილ ფინალურ შოუზე შეასრულებს.

სიმღერის ავტორი გიგა კუხიანიძეა, კომპოზიციაზე ვიდეოკლიპი კი ზაზა ორაშვილმა შექმნა. გადაღებები კინოთეატრ აპოლოში მიმდინარეობდა.

მარიამ ბიგვავამ მასშტაბურ მუსიკალურ ფესტივალზე ქვეყნის წარმომადგენლის სტატუსი საზოგადოებრივი მაუწყებლის პროექტ რანინაში გამარჯვების შედეგად მოიპოვა.

საიუბილეო, რიგით მე-20, საბავშვო ევროვიზიას წელს სომხეთის დედაქალაქი ერევანი უმასპინძლებს. აღსანიშნავია, რომ ქვეყანამ გასული წლის კონკურსის გამარჯვებული გახდა. 2022 წლის ევროფესტივალი კი 11 დეკემბერს, კარენ დემირჩიანის სპორტულ და საკონცერტო კომპლექსში გაიმართება. ამავე არენაზე ჩატარდა 2011 წლის საბავშვო ევროვიზია, სადაც საქართველომ მეორე გამარჯვება მოიპოვა.

ჯამში საქართველომ საბავშვო ევროფესტივალი სამჯერ მოიგო, რითაც კონკურსის რეკორდსმენია. 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. სამივე გამარჯვებული სიმღერის ავტორიც გიგა კუხიანიძეა. ამასთან, საქართველომ ევროვიზია ჯუნიორზე ორჯერ დაიკავა მეორე ადგილი და სამჯერ მოხვდა საუკეთესო ხუთეულში.

სხვათა შორის, სამივე გამარჯვებული საქართველოდან ერევანში დაგეგმილ წლევანდელ ღონისძიებაზეცაა მიწვეული.