ოქტომბერში გასული წლის ანალოგიურ პერიოდთან შედარებით სამომხმარებლო ფასები 10,6%-ით, წინა თვესთან შედარებით კი 0,5%-ით გაიზარდა. ინფორმაციას საქსტატი აქვეყნებს.

რატომ არის მნიშვნელოვანი: ინფლაცია ადამიანთა ხარჯებს ზრდის და თუ შემოსავალი უფრო სწრაფად არ იზრდება ისინი რეალურად ღარიბდებიან.

  • ფასების ზრდა განსაკუთრებით სოციალურად დაუცველებზე მოქმედებს.

დეტალები: ფასები ყველაზე მეტად — 15,8%-ით სურსათსა და უალკოჰოლო სასმელებზე გაიზარდა, მათ შორის:

  • პურსა და პურპროდუქტებზე 26,1%-ით;
  • რძის ნაწარმზე — 22,1%-ით;
  • მინერალურ წყალსა და ნატურალურ წვენებზე —21,9%-ით;
  • ყავასა და ჩაიზე — 20,6%-ით;
  • შაქარსა და ტკბილეულზე — 16,9%-ით.

უფრო კონკრეტულად საკვვები ჯგუფში ყველაზე მეტად — 76,1%-ით სიმინდის ფქვილი გაძვირდა.

  • ხორბლის ფქვილი — 36,1%-ით;
  • სულგუნი — 34,7%-ით;
  • ვერმიშელი — 30,4%-ით;
  • ხსნადი ყავა — 22,5%-ით;
  • წიწიბურა — 17,8%-ით.

ფასები ასევე გაზრდილია: ტრანსპორტის ჯგუფში — 11,6%-ით და კომუნალური გადასახადების ჯგუფში — 13,5%-ით.

  • სამომხმარებლო კალათაში შემავალ 305 დასახელების პროდუქტიდან, ოქტომბერში ყველაზე მეტად — 101%-ით საქალაქთაშორისო ტელეფონის გადასახდელი გაძვირდა.

ინფლაციასთან საბრძოლველად მიმდინარე წელს ეროვნულმა ბანკმა მონეტარული პოლიტიკა გაამკაცრა:

  • რეფინანსირების განაკვეთი 2021 წლის მარტის შემდეგ 8%-დან 11%-მდე გაიზარდა;
  • სამომხმარებლო სესხის მაქსიმალური ვადიანობა 4-დან 3 წლამდე შემცირდა.

საქსტატის ცნობით, ორნიშნა ინფლაცია უკვე მეთექვსმეტე თვეა გრძელდება.

  • მთავრობასა და ეროვნულ ბანკში ზრდის ტემპის კლებას 2023 წლის მეორე ნახევრიდან ელიან.