ოპოზიციონერმა დეპუტატებმა, ხათუნა სამნიძემ, თამუნა კორძაიამ, ანა ბუჩუკურმა და თეონა აქუბარდიამ კულტურისა და სპორტის მინისტრის, თეა წულუკიანის განცხადებასთან დაკავშირებით ბრიფინგი გამართეს.

რატომ არის მნიშვნელოვანი: გუშინ, 22 სექტემბერს პარლამენტში კულტურის მინისტრმა განაცხადა, რომ მას, როგორც ქალ მინისტრს, სპორტის ფედერაციებთან ქალთა უფლების კუთხით ბევრი პრობლემა აქვს.

  • მისი თქმით, ამაზე ვრცლად არ ისაუბრებს, რადგან არ სურს, "ქართული სპორტის იმიჯის დაანგრიოს" და აღნიშნა, რომ ზოგადად, სპორტში ძალადობა სერიოზული პრობლემაა და ამაზე სამუშაოა.
  • "პრობლემაა ისიც, რომ სპორტის სამინისტრო, როგორც კულტურის, არ იყოს მიჩნეული, რომ მოიტა ფული და არაფერი არ მკითხო, ეს პირდაპირ ნიშნავს რომ ვიღაცას აქვს განცდა, რომ შენ ეს ფული როგორც გინდა ისე გამოიყენო და თუ ვინმე შეგეწინააღმდეგება, მათ შორის, მინისტრი, მასზე ხელით გაიწიო და ასე შემდეგ".
  • "მაგრამ იქ ვდგავარ, სადაც ვდგავარ ჩემი იმდენი კილოთი, რამდენიც მაქვს და არ გავიწევი. არ მაქვს კუნთები, მაგრამ სხვა რამეები არ მაკლია".

დეპუტატების თქმით, არ შეიძლება ქალი მინისტრი იმ მდგომარეობაში იყოს, რომ მას ფიზიკურ შეხლამდე უწევდეს საკუთარი ფუნქციების განხორციელება და კაცებთან ურთიერთობა.

  • ასევე, აღნიშნავენ, რომ ნებისმიერი ქალი, რომელიც პოლიტიკაშია, უთანასწორობას განიცდის, ამიტომ, პოლიტიკური კუთვნილების მიუხედავად, მათ მიმართ სოლიდარულები იქნებიან.
  • დეპუტატები ამბობენ, რომ ამ საკითხით, როგორც კაცი დეპუტატები, ასევე, უფლებადამცველები და გენდერული საბჭო უნდა დაინტერესდეს.

ხათუნა სამნიძის განცხადებით, წულუკიანისთვის ფედერაციებთან დაკავშირებით დასმულ კითხვაზე პასუხი ძალიან საგანგაშო იყო.

  • დეპუტატის თქმით, ის, რომ კულტურის მინისტრი მოძალადეებზე არ საუბრობს, პრობლემაა.
  • "თქვა, რომ თავად მოაგვარებს პრობლემას და ეჭვიც არ მეპარება, ის არის ძლიერი ქალი მინისტრი, მაგრამ ეს არ ნიშნავს, რომ საჯაროდ არ უნდა ისაუბროს მოძალადეებთან დაკავშირებით".