ამის შესახებ უკრაინის პრეზიდენტის აპარატის მრჩეველმა, ალექსეი არესტოვიჩმა და მთავარი სადაზვერვო სამმართველოს ხელმძღვანელმა, კირილ ბუდანოვმა ისაუბრეს.

რატომ არის მნიშვნელოვანი: უკვე 6 თვეა, რაც რუსეთი უკრაინაში სრულმასშტაბიან ომს აწარმოებს.

  • არესტოვიჩის თქმით, ომის ახალი ეტაპი ორი-სამი თვე, ზამთრამდე გაგრძელდება.

კირილ ბუდანოვის განცხადებით, ომის გარდამტეხ მომენტზე მიანიშნებს რეგულარული აფეთქებები ოკუპირებულ ყირიმში.

  • მისივე თქმით, ოკუპანტებმა დაიწყეს იმის გაცნობიერება, რომ მათი ჯარი და საჰაერო თავდაცვის სისტემები არც ისე საიმედო და ძლიერია, არმიას არ შეეძლო დროებით ოკუპირებული უკრაინის ტერიტორიის დაცვა.
  • "მათ გადაჭარბებულად შეაფასეს თავიანთი არმიის შესაძლებლობები. ეს საერთოდ არ არის მსოფლიოს მეორე არმია, არც მეორე და არც მეოთხე... ამიტომ, გარდამტეხი მომენტი უკვე დაწყებულია".

ალექსეი არესტოვიჩის განცხადებით, ომში მეოთხე ეტაპი დაიწყო. მისი თქმით, ამ ეტაპს წინ უძღოდა სამი ეტაპი:

  • პირველი — სრულმასშტაბიანი შეჭრის დაწყებიდან უკრაინის ჩრდილოეთიდან რუსული ჯარების განდევნამდე;
  • მეორე — ლისიჩანსკისა და სევეროდონეცკის ოკუპაცია;
  • მესამე — ნიკოლაევისა და კრივოი-როგის მიმართულებებით ოკუპანტების მხრიდან წინსვლის წარუმატებელი მცდელობები.
  • "ამისთვის [მეოთხე ეტაპისთვის] დამახასიათებელი იქნება ის ფაქტი, რომ მხარეები დადგებიან და თავს დაესხმებიან ერთმანეთს რამდენადაც შეეძლებათ, მაგრამ ჩვენ გვაქვს ბევრად უკეთესი შანსები თავდასხმის, იმ მარტივი მიზეზის გამო, რომ ჩვენ გვაქვს HIMARS, მათ არა".

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება მსოფლიოში.