31 მაისიდან - 18 ივნისამდე საქართველო რაგბის ოცწლამდელთა მსოფლიო ჩემპიონატს მასპინძლობს. ტურნირში მსოფლიო რაგბის ტოპ 12 ქვეყნის ახალგაზრდული ნაკრები მიიღებს მონაწილეობას.

ოცწლამდელთა პირველი მსოფლიო ჩემპიონატი 2008 წელს ჩატარდა და მაშინვე იქცა ახალი ტალანტებისა და რაგბის ვარსკვლავების სამჭედლოდ. ამ ტურნირში მონაწილე სპორტსმენები, მალვე გადავიდნენ თავიანთი ქვეყნების ეროვნულ ნაკრებებში და რაგბის მსოფლიო ჩემპიონატზე, ექვსი ერის ჩემპიონატსა და სხვა მაღალი რანგის შეჯიბრებებზე იასპარეზეს.

ამ მნიშვნელოვან ტურნირზე სათამაშოდ საქართველოში 11 ქვეყნის ასაკობრივი ნაკრები ჩამოვა:

  • არგენტინა
  • ავსტრალია
  • ინგლისი
  • საფრანგეთი
  • ირლანდია
  • იტალია
  • ახალი ზელანდია
  • სამოა
  • შოტლანდია
  • სამხრეთ აფრიკა
  • უელსი

წლევანდელ ჩემპიონატზე ინგლისი მოქმედი ჩემპიონისა და 6 ერის გამარჯვებულის სტატუსით წარდგება, რომელიც სწრაფი და სანახაობრივი თამაშითა და წაუგებელი სერიით, დიდი სლემით დაასრულა. თუმცა, ოთხი წლის განმავლობაში მეხუთე ტიტულისთვის ბრძოლა რამდენიმე გამოცდილი მოთამაშის გარეშე მოუწევთ, რომლებიც ეროვნულ ნაკრებში არიან გამოძახებული არგენტინის წინააღმდეგ სათამაშოდ.

გამოცდილი მოთამაშეები დააკლდება ახალ ზელანდიასაც, მათ შორისაა ჯორდი ბარეტი, რომლის შესანიშნავი თამაში ოლ ბლექსის გუნდს არ გამორჩა და სავარაუდოდ, ბრიტანელი და ირლანდიელი ლომების წინააღმდეგ იქნება გამოძახებული. დანაკლისის მიუხედავად, ახალი ზელანდიის მწვრთნელს, ქრეიგ ფილპოტს გუნდში კარგი მოთამაშეების ნაკლებობა ნამდვილად არ აქვს, რაც ოკეანეთის ოცწლამდელთა ჩემპიონატის მოგებით დაამტკიცა, როდესაც ახალმა ზელანდიელებმა ფიჯი, სამოა და ავსტრალია დაამარცხეს.

ინგლისისა და ახალი ზელანდიისგან განსხვავებით, ავსტრალია საქართველოში გაძლიერებული ნაკრებით ჩამოვა. მსოფლიო ჩემპიონატისთვის ავსტრალიელებმა სუპერ რაგბისა და შვიდკაცას უკვე გამოცდილი მოთამაშეები დაიმატეს, მათ შორისაა ჰენრი ჰატჩსონი, რომლის დებიუტი შვიდკაცა რაგბიში ჯერ კიდევ 2015-16 წლებში შედგა.

საკმაოდ ძლიერი შემადგენლობით იქნება წარმოდგენილი სამხრეთ აფრიკაც. „სპრინგბოკსი“ წინა სეზონის გამორჩეული მოთამაშისა და სუპერ რაგბის კლუბ შარქსის წევრის, ქარუინ ბოშის დახმარებით შეეცდება გასული წლის შედეგის გაუმჯობესებას და წესით, მეოთხე ადგილს აღარ უნდა დასჯერდეს.

გასული წლის ჩემპიონატის მესამე ადგილოსანი არგენტინა კი წელსაც შესანიშნავ ფორმაშია. მიუხედავად იმისა, რომ ტურნირს, ტრავმის გამო, შვიდკაცას მორაგბე, მატიას ოსადჩუკი გამოტოვებს, არგენტინელების შემადგენლობაში ახალგაზრდული ოლიმპიური თამაშების ბრინჯაოს მედალოსნებიც იქნებიან, ბაუტისტა დელგუის ჩათვლით.

C ჯგუფში, არგენტინას, ახალგაზრდული ოლიმპიადის გამარჯვებული, საფრანგეთს ნაკრები დაუპირისპირდება, რომელთა რიგებში განსაკუთრებულ ყურადღებას 6 ერის ამომავალი ვარსკვლავი, რომან ნტამეკი იმსახურებს, მით უმეტეს რომ ეს გვარი ფრანგული რაგბის ისტორიაში განსაკუთრებულ ადგილს იკავებს, ლეგენდარული ფრანგი მორაგბის, ემილ ნტამეკის წყალობით.

ტურნირი ახალგაზრდა მორაგბეებისთვის თავის გამოჩენის უნიკალური შანსია. ამ შეჯიბრს მსოფლიო რაგბის ყველა მნიშვნელოვანი პირი, მწვრთნელები, სკაუტები და კლუბების მფლობელები აკვირდებიან და გარდა ეროვნულ ნაკრებში გადასვლის პერსპექტივისა, ახალგაზრდებს კარგ კლუბებში მოხვედრის შანსიც ეძლევათ.

რაგბის მოყვარულებს საშუალება ექნებათ მომავალი ვარსკვლავების თამაშები სტადიონზე ნახონ და ისინი იქამდე გაიცნონ, ვიდრე მათ დანარჩენი მსოფლიო ნახავს. მაგალითად, რაგბის 2015 წლის ჩემპიონატის გამარჯვებული ნაკრების, ახალი ზელანდიის 10 წევრი კარიერის დასწყისში სწორედ ამ ტურნირზე, All Black-ის ოცწლამდელთა რიგებში გამოდიოდა.

საქართველოში ყოფნის პერიოდში, ისევე როგორც სხვა მასპინძელ ქვეყნებში, მორაგბეები ადგილობრივ კულტურასაც გაიცნობენ და ეწვევიან ბავშვთა გუნდებს, რა დროსაც პატარა მორაგბეებს თავიანთ რჩევებსა და გამოცდილებას გაუზიარებენ.

წლევანდელი მსოფლიო ჩემპიონატი საკმაოდ დაძაბული და საინტერესო სანახავი იქნება, რადგან თორმეტივე მონაწილე გუნდი კარგად მომზადებული და ძლიერი შემადგენლობით იქნება წარმოდგენილი. განაცხადებიდან უკვე ცნობილია რომ თბილისსა და ქუთაისში გასამართ მატჩებში, ახალგაზრდული ოლიმპიური თამაშების მედალოსნები, მსოფლიოს უძლიერესი სარაგბო ტურნირის - სუპერ რაგბის - მოთამაშეები, შვიდკაცა რაგბის ვარსკვლავები და ეროვნული ნაკრების წევრებიც კი იასპარეზებენ.

რაგბის ოცწლამდელთა მსოფლიო ჩემპიონატი ყველაზე მნიშვნელოვანი მაინც ჩვენი ნაკრებისთვისაა. ჩვენი ახალგაზრდა სპორტსმენები ტოპ გუნდებს დაუპირისპირდებიან, რაც მათ გამოცდილებაზე პოზიტიურად აისახება და ეროვნულ ნაკრებში გადასვლის შემდეგ გუნდში უკვე გამოცდილი და ტექნიკური მოთამაშეები გვეყოლება.

ჩემპიონატის მასპინძელი, საქართველოს ოცწლამდელთა ნაკრები ჩემპიონატს კარგად მომზადებული შეხვდება. 2016 წელს, მსოფლიო ჩემპიონატის დებიუტანტემბა, კარგი შთაბეჭდილება დატოვეს და მეათე ადგილი დაიკავეს. წელს კი, უკვე გამოცდილ ახალგაზრდულ ნაკრებს, ორი ეროვნულის მოთამაშის, ლაშა ტაბიძისა და გელა აფრასიძის დახმარებით, არაერთი სიურპრიზის შეთავაზება შეუძლია, რითაც კიდევ უფრო გაამყარებენ ქართული რაგბის მზარდ რეპუტაციას.

საქართველოს ნაკრები პირველ მატჩს არგენტინის წინააღმდეგ ითამაშებს. შეხვედრა 31 მაისს, ავჭალის სტადიონზე, 18:00-ზე დაიწყება.