შესაძლოა, სულ მალე, ბაზარზე ახალი, უნივერსალური კონტრაცეპტივი შემოვიდეს, რომელიც ორივე სქესისთვის ეფექტური იქნება, არ აქვს ჰორმონალური გვერდითი მოვლენები და შეიძლება, კონტრაცეფციის მოწინააღმდეგეებიც არ გააღიზიანოს.

ახალ კვლევაში, რომელიც ბერკლის უნივერსიტეტის მეცნიერებმა გამოაქვეყნეს, ნათქვამია, რომ მცენარეებში არსებული ორი ქიმიური ნივთიერება სპერმას კვერცხუჯრედში შეღწევის უნარს აკარგვინებს.

ადამიანის სპერმას კვერცხუჯრედამდე მისასვლელად, საკუთარ ზომაზე 24 ათასჯერ დიდი დისტანციის დაფარვა უწევს, რა დროსაც კუდის აქეთ-იქით ქნევით მოძრაობს. როდესაც სპერმა კვერცხუჯრედთან მივა, ამ დროს კვერცხუჯრედში შეღწევას შტოპორისებრი ტექნიკით ცდილობს, ანუ შეიძლება ითქვას, რომ კვერცხუჯრედის დამცავ პელუციდურ შრეს ბურღავს. განაყოფიერების პროცესის ეს ბოლო ეტაპი სპერმის კუდში კალციუმის იონების გადასროლით ხდება.

სპერმას უნიკალური იონური არხი აქვს, რომელსაც კატსპერი ეწოდება. როდესაც სპერმატოზოიდი კვერცხუჯრედს უახლოვდება, ეს იონური არხი პროგესტერონის სიახლოვის გამო აქტიურდება. მკვლევარებმა დაადგინეს, რომ არსებობს ორი სახის ქიმიური შენაერთი, რომლებიც სპერმის "ბურღვის" უნარს აქვეითებს. ყველაზე წარმატებულად კი ამ ამოცანას თავს ლუპეოლი და პრისტიმერინი ართმევენ.

ეს მცენარეული ქიმიკატები იმ მცენარეებში ჭარბობს, რომლებსაც ადამიანები უკვე დიდი ხანია მოიხმარენ. ლუპეოლი ალოეში, ყურძენში, ზეთისხილსა და კომბოსტოში გვხვდება. პრისტიმერინი უფრო იშვიათია და მიიღება ჭანჭყატისებრი მცენარის Tripterygium wilfordii-სგან, რომელსაც ჭქა-ქუხილის ღმერთის ვაზს უწოდებენ.

მეცნიერებმა დაადგინეს, რომ ამ ნივთიერებებს პროგესტერონის მიმართ სპერმის მგრძნობელობის გაქრობა შეუძლიათ, რაც იმას ნიშნავს, რომ იონური არხები აღარ გააქტიურდება და სპერმა კვერცხუჯრედის განაყოფიერებას ვერ შეძლებს. მათი თქმით, ეს მეთოდი ათჯერ უფრო ეფექტურია, ვიდრე ბაზარზე არსებული სხვა კონტრაცეპტივები.

მეცნიერთა ჯგუფი, რომელიც ამ კვლევაზე მუშაობდა კომპანიის შექმნას გეგმავს, რომელიც ბაზარზე ამ მეთოდს იაფად შემოიტანს, ისინი თავიანთ აღმოჩენას მოლეკულურ პრეზერვატივს უწოდებენ.