ცნობილი ამერიკელი კომიკოსი კრის როკი ოსკარის წლევანდელ დაჯილდოებაზე მომხდარ ინციდენტს კიდევ ერთხელ გამოეხმაურა. როკმა, რომელსაც ნომინაციის გამოცხადებისას ხუმრობისთვის ოსკაროსანი მსახიობი უილ სმიტი ფიზიკურად დაუპირისპირდა, აღნიშნა, რომ საკუთარ თავს მსხვერპლად არ მიიჩნევს. თუმცა, კომიკოსი ამბობს, რომ სმიტის გაწნილი სილა მწარე იყო.

"ვინც ამბობს, სიტყვა მწარეაო, მას სახეში მუშტი არ მოხვედრია", — ამბობს როკი, — "მე მსხვერპლი არ ვარ. ჰო, ძალიან მტკივნეული იყო. თუმცა, ეგ დავივიწყე და მეორე დღეს სამუშაოზე წავედი. ქაღალდით მოყენებული ჭრილობისთვის საავადმყოფოში არ გავრბივარ".

როკმა, რომელიც 2022 წლის კინოაკადემიის დაჯილდოებაზე საუკეთესო დოკუმენტური ფილმის ნომინაციას წარადგენდა, თავის მონოლოგში უილ სმიტის ცოლის, ჯეიდა პინკეტ სმიტის, გადაპარსულ თავზე იხუმრა. ამის შემდეგ, სმიტი სცენაზე აიჭრა და კომიკოსს სახეში გაარტყა. თავის ადგილზე დაბრუნებისას მან როკს დაუყვირა, ჩემი ცოლის სახელი აღარ ახსენოო.

კრის როკმა ინციდენტის შემდეგ განაცხადა, რომ არ აპირებდა, მსახიობისთვის ეჩივლა. მართალია, უილ სმიტმა მოგვიანებით მოიბოდიშა კიდეც, მაგრამ კინოაკადემია მაინც დატოვა. სხვათა შორის, მსახიობს, რომელმაც ინციდენტის საღამოს ოსკარიც მიიღო, პრესტიჟულ კინოღონისძიებაზე დასწრება მომდევნო ათი წლით აეკრძალა.

რაც შეეხება როკს, ოსკარის დაჯილდოების შემდეგ მან კომედიის ტური წამოიწყო. კომიკოსმა ასევე აღნიშნა, რომ მოვა დრო, როცა მომხდარზე თავის გამოსვლებშიც ისაუბრებს და ეს "სერიოზულიც იქნება და სახალისოც".