ბავშვების ანცობისა და ხუმრობების წინასწარ განჭვრეტა ძალიან რთულია: ისინი ყოველთვის ახერხებენ ჩვენს გაოცებას, ზოგჯერ — შეშინებასაც კი. მაგალითად, ალაბამას ერთ-ერთ სამეზობლოში მცხოვრები 5 წლის ბიჭი მეზობლების შეშინებით ერთობა. ბავშვმა ცნობილი საშინელებათა ფილმის პერსონაჟის, ჩაკის ნიღაბი მოირგო და სამეზობლო დაატერორა.

ფოტო: Kendra Walden

ჩაკი Child's Play-ის პერსონაჟია — თოჯინა, რომელშიც სერიული მკვლელის სულია ჩასახლებული და სამეზობლოს შიშის ზარს სცემს. აშკარაა, რომ პატარამ "დავალებას" თავი მშვენივრად გაართვა!

ნიღბიანი ბავშვის ფოტო მისმა ერთ-ერთმა მეზობელმა, კენდრა უოლდენმა ფეისბუქზე დადო.

"პინსონში მცხოვრებო ჩაკის ნიღბიანი ბავშვის მშობლებო, გთხოვთ, მიხედეთ თქვენს შვილს. ლამის გულის შეტევა მივიღე", — დაწერა კენდრამ.

ფოტო: Kendra Walden

მომხმარებლებმა ფოტოები მალევე აიტაცეს და ბევრიც იცინეს, თუმცა კენდრასა და იმ ადამიანებს, რომლებმაც ქუჩაში მორბენალ ჩაკის მოკრეს თვალი, საქმე სასაცილოდ არ ჰქონდათ.

კენდრას თქმით, სახლში რემონტისთვის მუშები ჰყავდა. გზად ნიღბიანი ბავშვი დაინახეს. თავიდან ეგონათ, რომ რაღაც მოეჩვენათ, თუმცა როცა მიუახლოვდნენ, დარწმუნდნენ, რომ თვალები არ ატყუებდათ. კენდრას თქმით, ბავშვმა მოგვიანებით ნიღაბი მოიხსნა, მაგრამ როგორც კი დაინახა, რომ მეზობლები უახლოვდებოდნენ, ნიღაბი კვლავ მოირგო და ხალხის შეშინება გააგრძელა.

ფოტო: Kendra Walden

მას შემდეგ, რაც ფოტოები ვირუსულად გავრცელდა, კენდრას ბავშვის დედაც გამოეხმაურა. იმედია, ეს მხიარული პატარა მკაცრად არ დაუტუქსავს!