წყლის სპორტის საერთაშორისო ორგანიზაცია FINA-მ ცოტა ხნის წინ ახალი გადაწყვეტილება გამოიტანა, რომლის მიხედვითაც, ტრანსგენდერ ქალებს ქალთა შეჯიბრებებში მონაწილეობა ეკრძალებათ, თუ კაცის სქესობრივი სიმწიფის ერთი ფაზა მაინც გაიარეს. FINA-ს მიხედვით, თუ ტრანსგენდერმა ქალმა ტრანზიციის პროცესი ტანერის შკალის მეორე სტადიის ან 12 წლის მიღწევის შემდეგ დაიწყო, ის ქალთა შეჯიბრებებში ვერ იასპარეზებს.

FINA-ს 152 წევრიდან გადაწყვეტილებას მხარი 71%-მა დაუჭირა. FINA-ს მიხედვით, სხეულში ტესტოსტერონის დონის მედიკამენტებით რეგულირების მიუხედავად, ტრანსგენდერი ქალები სისგენდერ ქალებთან (ინდივიდი, რომლის ბიოლოგიური სქესი ემთხვევა გენდერულ იდენტობას) შედარებით უპირატესობას ფლობენ.

"ჩვენ უნდა დავიცვათ ჩვენი სპორტსმენების ასპარეზობის უფლება, მაგრამ ამასთანავე უნდა დავიცვათ სამართლიანი შეჯიბრების უფლება ჩვენს ღონისძიებებზე, განსაკუთრებით კი Fina-ს ქალთა შეჯიბრებებზე", — განაცხადა ორგანიზაციის პრეზიდენტმა.

FINA-ს თქმით, შეიქმნება ე.წ. ღია კატეგორია, რომელში მონაწილეობის უფლებაც ყველა სპორტსმენს ექნება:

"FINA ყველა სპორტსმენს მიესალმება. ღია კატეგორიის შექმნა ნიშნავს იმას, რომ ყველას ექნება პროფესიონალურ დონეზე ასპარეზობის შესაძლებლობა. ეს აქამდე არ მომხდარა, ამიტომ FINA იქნება პირველი", — განაცხადა ორგანიზაციის პრეზიდენტმა.

ეს რაგბის შემდეგ მეორე შემთხვევაა, როცა სპორტის ოლიმპიურმა ორგანიზაციამ ტრანსგენდერ ადამიანებს კონკრეტულ კატეგორიაში მონაწილეობის უფლება არ მისცა. სპორტის სხვა სახეობებში ტესტოსტერონის დონის შემოწმებით წყვეტენ, შეუძლია თუ არა ტრანსგენდერ ქალს ქალთა კატეგორიაში ასპარეზობა.

აღნიშნულ საკითხზე FINA-მ მსჯელობა მას შემდეგ დაიწყო, რაც გასულ წელს აშშ-ის ერთ-ერთ შეჯიბრებაში ტრანსგენდერმა მოცურავე ქალმა, ლია თომასმა გაიმარჯვა. ახალი გადაწყვეტილების შესაბამისად, ლია ქალთა კატეგორიაში ვეღარ იასპარეზებს.

ასევე იხილეთ: